Зөвлөлт Украинд цэргийн дээд сургуульд суралцан төгсгөж зэвсэгт хүчиндээ зүтгэж явсан олон арван офицерын нэгийн хувьд дайн байлдаан, давшилт хориглолтын талаар энгийн иргэдийг бодвол гадарлана. Тэр мэдлэг туршлагаараа өнөөгийн Орос-Украины энэ дайныг харж, оперативын цагийн байдлыг үнэлдэг. Фронтын мэдээнүүд Орост тун ээлгүй байна. Оросын зэвсэгт хүчин стратеги–оперативын нөөцөө шавхан байлдаж байна. Энэ тухай 2024 оны үр дүн, 2025 оны төлөв дээр гадаадын цэргийн мэдээллээс хөрвүүлж буулгая. Institute for the Study of War гэсэн хаягтай хүрээлэн АНУ-аас тасралтгүй мэдээлдэг. Дайн судлалын институт энэ удаа дайтагч ОХУ-ын эзлэн авсан ба чөлөөлсөн нутаг дэвсгэрийн харьцуулалт 2024 оноор гаргажээ.
Орос нь 4.168 кв.км буюу (бараг юу ч биш, баярлах юм биш гэж бичжээ-орч.), үндсэндээ Украины хэдэн жижиг тосгон суурин, мөн Украинд эзлүүлсэн Курскийн зарим тосгон болж таарчээ. Гэхдээ ингэж “чөлөөлөлт” хийхийн тул рекорд хохирол амсаж 420.000 цэргээ алджээ.
Оросын хохирлыг яагаад рекорд гэж нэрлэв? Учир нь 1 кв.км-т 102 цэргээ шарил болгосон ба дээрээс хичнээн хатуу шахаад байсан ч 12 дугаар сард оросын давшилт саарч, тэдний өмнө улам олон бэхлэгдсэн районууд амдаад отож байжээ. Зөвхөн Покровск руу 40-хөн км-т 5 дивизээ зэвсэг техниктэй нь сөнөөлгөчихөөд утгагүйгээр давшсаар байна.
Fox News ТВ-ээс ярьж байна. Украины эсрэг ОХУ-ын бүрэн хэмжээний дайн бараг гурван жил үргэлжиллээ. Аажим аажмаар урагшилж байж магадгүй, гэтэл Украины батлан хамгаалах хүчин зөрүүлээд Оросын нутаг дэвсгэрийн нэг хэсэгт хяналтаа тогтоолоо. Ялагдах, ухрах, хөөгдөж гарах магадлал одоогоор харагдахгүй байна.
2024 оны нэг онцлог бол Украин түүхэндээ хамгийн их хэмжээний цэргийн тусламж (278 тэрбум ам.доллар) хүртсэний 87 тэрбум нь Вашингтоноос үзүүлсэн тусламж байна. 2023 онд Орос нь хичнээн их цэрэг илгээж хүний олноор илүүрхсэн боловч ганц ч томхон ялалт байгуулаагүй, цэргийн машинаа хичнээн их дайчлаад 2024 онд мөн тийм дүнтэй байна. Харин Украин нь барууны тусламжийг хариулах нүүртэй, итгэлтэй түнш, энэ дайн ба энх тайванд хариуцлагатай чин сэтгэлээсээ ханддаг гэдгийг барууны орнуудын өмнө 2024 онд нотлож чаджээ.
Украины эсрэг дайныхаа бүх хугацаанд Орос нь явган цэрэг, танк, их буунд биш харин пуужин, нисэгчгүй онгоцонд найддаг гэдгээ 2024 онд харуулсан, зорилго нь тодорхой. Ялагдаж өгөхгүй, Оросоос сүрдэхгүй байгаа украинчуудыг хашраах цээрлүүлэх зорилготой. Тийм учраас 2024 онд Украины хотуудад агаараас атаклахыг онцгойд үзжээ.
Дорнод Украины зарим хотуудад бүхэл бүтэн районуудыг устгаж чаджээ. Оросын гавьяа нь ердөө энэ. Дайн судлалын институтын судалснаар 2022 онд оросууд ялагдаад хөөгдөөд гарчихсан Харьков мужид ОХУ 2024 оны 5 дугаар сард шинэ фронтын шугам нээсэн, өөрөөр Оросын давшилтад мэдэгдэм өөрчлөлт гараагүй. Гэхдээ 2023 оныхтой харьцуулбал 2024 онд илүү олон байлдаан мөргөлдөөн өрнөсөн. ОХУ-ын Курск мужид Украины цэрэг довтлон орсон нь дэлхийн II дайнаас хойш анх удаа Орос өөрийн нутагтаа гадны цэрэг нэвтрүүлсэн, “Кремлийн ар гэрийн нутаг дэвсгэр” рүү Дорнод фронтоос хүчийг нь татаж хөдөлгөөнд оруулсан, тэгснээрээ Украин нь энх тайвны хэлэлцээ хийх хөзөртэй болсон явдал өнгөрсөн оны нэг онцлог байлаа. 2025 он Украины батлан хамгаалахад шийдвэрлэх жил болно. Шинэ шинэ зэвсэг хүлээн авч, зэвсэглэлээ бaяжуулна. Юуны өмнө агаарын довтолгооноос хамгаалах (ПВО) системээ бэхжүүлнэ, “Мираж-2000”-ыг энэ байлдаандаа оруулна, мөн Таурус, F-16 зэрэг шинэ шинэ зэвсгээр ОХУ-д цохилт өгнө. 2025 онд гурван зорилт өмнөх 2024 оных шигээ хэрэгжинэ.
1.Оросын ПВО-г устгана.
2.Нисэх хүчний бааз-аэродормын дэд бүтцийг онгоцтой нь устгана.
3.Нефть-шатахууны баазуудыг устгана.
2024 онд устгагдсан оросын зэвсгийн агуулах, байршлын шинэхэн зургийг сонирхоно уу.
Хамгийн сүүлийн өдрийн шинэхэн мэдээ. Хар тэнгист украины тэнгисийн “Магура” дроноос бичил пуужин тэнгэрт хөөргөж Оросын армийн хоёр ч нисдэг тэргийг экипажтай нь сөнөөжээ. Дэлхийн дайны түүхэнд анхных нь гэж цэргийн шинжээчид тэмдэглэж байна. Зөвхөн флотын хөлөг онгоц, бааз, байршил, бэхлэлт рүү биш агаарт нисч яваа биетийг сөнөөдөг шинэ төрлийн тэнгисийн дрон украинчууд бүтээжээ.
Одоо Орос нь Хар тэнгис дээгүүр байлдааны онгоц, нисдэг тэрэг нисгээд байхааргүй боллоо. Фронтод хэрэглэж буй нийт дроны 96% тэд өөрсдөө үйлдвэрлэж байна. Оросын нутгийн гүнд 2000 км-т цохилт өгөх чадалтай боллоо.
Дээр юу өгүүлнэ вэ? Оросын ялалтыг бахдан сайшаах гэж байгаа бол Украины хотууд, энгийн хүн амын орон сууц, эмнэлэг, сургууль, цэцэрлэг, соёлын төв, базаар захуудыг бөмбөгдөж пуужиндаж ид бахаа гаргасныг нь уухайлах л үлдлээ. Украин ба Зеленскийг амаа цангатал харааж болно. АНУ ба Баруун Европыг нус цэр угаадсаараа булж болно. Харин Орос энэ дайндаа ялна гэж 2025 онд жилжингээ горьдвол эрүүл мэнд, тархи нерв чинь дуусах байх даа. Хэрэв эрүүл хүн бол. Орос ялна, ялж байна гэж сэтгэлээ чилтэл гурван жил харлаа. Битүү их уйллаа... Сайн уйлж ав!
Адьяaгийн Батсайхан (бэлтгэл хошууч)
