Зөвлөлт Украинд цэргийн дээд сургуульд суралцан төгсгөж зэвсэгт хүчиндээ зүтгэж явсан олон арван офицерын нэгийн хувьд дайн байлдаан, давшилт хориглолтын талаар энгийн иргэдийг бодвол гадарлана. Тэр мэдлэг туршлагаараа өнөөгийн Орос-Украины энэ дайныг харж, оперативын цагийн байдлыг үнэлдэг. Фронтын мэдээнүүд Орост тун ээлгүй байна. Оросын зэвсэгт хүчин стратеги–оперативын нөөцөө шавхан байлдаж байна. Бүтэн гурван жил дуусах дөхөж байдаг, гэтэл стратегийн ганц ч ялалтгүй. Одоо байтлаа Путинээ цааш харуулж байж энх тайванд хүргэнэ гэсэн далд хуйвалдаан Москвад бэлтгэгдэж байгаа тухай мэдээллээс хөрвүүлж буулгая.

Дайн хэзээ дуусдаг юм бэ гэдэгт цэргийн түүхчид хариулахдаа фронт дээр биш гэж нотлодог. Герман дайны талбарт ялагдсан гээд дэлхийн нэгдүгээр дайн дуусаагүй. Герман улс төр-эдийн засгийн хувьд өөрөө сүйрсэн тул дэлхийн нэгдүгээр дайн дууссан.

Хоёрдугаар дайнд ч тэр, Герман, Япон хоёрт тэр тавилан ирсэн. Яг одоо Орос яг ийм замаар явж байна. Орос-Украины фронт дээр Орос ялагдаагүй, Украин ялаагүй, гэтэл Орос орон энэ дайныг цааш аваад явах нийгэм-эдийн засаг, сэтгэхүйн нөөц нь барагдах дөхөж байна. Аргагүй шүү дээ. Гуравхан хоногт дуусгана гэсэн цэргийн тусгай ажиллагаа гурван жил үргэлжлээд Оросын нийгмийг залхаачихтай зэрэг юун ялах, тэсч үлдэхийн төлөө л оросууд залбирч байх шиг бололтой. Одоо ТВ, сайтаас хар даа. Украинаар дүүрэн оросуудын хаяж зугтаасан хүнд техникүүдийн эвдэрхий шатсан төмрийн сэг.

Тэр их хогноос цугуулан, засч сэлбэн, эсвэл сэлбэгт хэрэглэн фронт руу илгээх гэж украины инженерийн цэрэг завгүй ажиллаж байна. Дрондуулан сөнөснийг хасаад тооцоход л олон зуун техникүүдээ хаяж зугтаадаг Оросын арми ялах ямар ч чадваргүй, бас цэрэг нь тийм хүсэлгүй болсон мэт харагдана.

Германы Bild сэтгүүлд бичсэнээр, Путиныг энэ жил дайнаа дуусгана гэж найдаж байгаа бөгөөд аль хэдийнээ тийм дохио илгээж эхэлсэн гэжээ. Фронтод цэрэг нь бүтэлгүйтэх яахав, сөнөөлгөсөн тэр их танк их буу Орост барагдахгүй их бий гэж бодоход Оросын нийгэмд зээлийн хүү, хүнсний үнийн өсөлт, рублийн ханшны уналт зэргээс шалтгаалан Орос орон энэ дайныг зогсоохыг хүсч байна хэмээн германы албаныхан үздэг болсон, Оросын цэрэг–аж үйлдвэрийн цогцолбор нь гурван ээлжээр эрчтэй ажилласнаас болоод бусад салбаруудад хямрал нүүрлэсэн, одоо зөвхөн “ялалт” гэж харуулах өчүүхэн төдий үзэгдлийг дэвэргэн нийгэмдээ сурталчилбал Путин тэсч үлдэж магадгүй гэж бичжээ.

“Украингүйгээр НАТО?” гэсэн мэссэж европын сошиал ертөнцөд их түгж байна. Хэрэв Орос эргэж хүчирхэгжээд Европ руу өнгөлзвөл тийм болзошгүй дайнд НАТО, Европ нь Украингүйгээр ялах ямар ч боломж байхгүй гэсэн мэссэж бололтой.

“Z-патриот” гэж Оростоо алдаршсан Максим Калашников Путиныг устгахыг шууд уриалсан пост оруулжээ. Ердөө хорт “токсичный актив” гэж нэрлэжээ. “Энэ нөхөртэй байгаад байвал удахгүй Оросын дэглэм нурж, дарангуйлагч Путиныг тойрон хүрээлэгчид нь устгах болно” хэмээн үзмэрджээ.

Путины тойрон хүрээлэгчид Баруунтай эвлэрч учраа олохыг оролдож байгаа ба энэ дайнаас мултран гарахыг хамгийн түрүүн хүсч буй, үүнд олон янзын хувилбар байна гээд “Бид шинэ горбачевщина (“Горбачевчлол”), шинэ перестройк руу тэмүүлж байна, Баруунтай энх тайвны тохиролцоонд хүрэхийг оролдох болно, ухралт хийж таарна хэмээн Z-военкор онцолжээ. Дарангуйлагчийн (Путины) одоогийн байдал нь ОХУ-ыг нураах эдийн засгийн гамшиг авчирч, одоо манай эх оронд эдийн засаг маш муу байна. Бид унахын босгон дээр ирлээ. Манай маш олон салбар аль хэдийнээ уначихсан, металлург, машины аж үйлдвэр, эсвэл унахын босгон дээр байна, пад харанхуй тамын шөнө ирлээ”–нөхөр Калашников анхааруулжээ. Дээр юу өгүүлнэ вэ? Оросын ялалтыг тэвчээр заан хүлээгээд бүтэхгүй боллоо гэдэг нь харагдаж байна. Украин ба Зеленскийг амаа цангатал хараа! АНУ ба Баруун Европыг нус цэр угаадсаараа турги! Харин Орос энэ дайндаа ялна гэж 2025 онд жилжингээ горьдвол эрүүл мэнд, тархи нерв чинь тэсэхгүй шүү. Хэрэв эрүүл монгол бол!

Адьяaгийн Батсайхан (бэлтгэл хошууч)