АН-ын гишүүн Ц.Чинбаттай ярилцлаа.
-Та АН-ын гишүүн, гэхдээ АН-ын томоохон фракцийн нэг, МоАХ-ны дарга Х.Баттулга ба түүний фракцийнханд маш шүүмжлэлтэй хандаг. Ямар учраас ингэж шүүмжлэлтэй ханддаг юм вэ?
-АН өөрөө чөлөөт эдийн засаг, чөлөөт өрсөлдөөн хувь хүний идэвхи санаачлага, хувийн өмч, нээлттэй засаглал, чөлөөт нийгмийг хүсдэг үзэл баримтлалтай нам. Харин үүний эсрэг үзэл санаатай Монголыг хорлож байгаа хүмүүстэй яаж нэг дор хамт байх вэ гэдэг өөр асуудал. Би ялангуяа Х.Баттулгыг дагаад яваад байгаа хүмүүсээс дэлхий ертөнц дээр газрынхаа ашигт малтмалыг бүгдийг нь дээрэмдэж аваад хөгжөөд, жаргаж байгаа улс хаана байна гэж асуумаар байна. Дэлхий дээрх 200-аад улс үндэстэн дотор тийм улс байна уу? Байхгүй. Харин үүнийхээ төлөө хэдэн олигархиуд, дээрэмчид бий болж, иргэдээ дарангуйлж дарамталж амьдардаг жишээг би захаас нь дурьдаад өгч болно. Белорусь байна, Венесуэль байна, Орос байна. Энэ мэт маш олон улс орнуудыг би жишээ татан ярьж өгч чадна. Би С.Ганбаатар, Х.Баттулгыг энэ зарчим үзэл санаан дээр мэтгэлцэе гэж урьсан.
Төмөр замыг нууцын зэрэглэлд оруулсан байсан. Бид нар хэдэн төгрөгөөр төмөр зам барьсныг нь мэдэхгүй. Мухар төмөр зам барьсан байсан. Одоо дахиад 14 тэрбум юаны алдагдлыг бид нар Хятадад төлөх гэж байна. Дээрээс нь ахин 3 орчим тэрбум юанаар бид нар төмөр зам холбуулах гэж байна.
Үүний ард зүгээр л бид нараас албан бус тоо баримтаар нь бодоод үзэхэд 13 орчим их наяд төгрөгийг хулгайлсан байна. Салхитын мөнгөний ордоор өр тэглэсэн гээд ахмадууд маань ярьдаг. Одоо хүртэл татвар төлөгч бид бүхэн төлөөд л явж байна. Тэр ахмадууд өөрсдөө сүү, талх, махныхаа мөнгөөр эргээд тэр мөнгийг нь төлөөд явж байна. Нөгөө Салхитын мөнгөний орд нь ашиглагдаад дууссан. Дампуурсан. Бас бид түүнийг нь төлөөд л явж байна. Одоо ийм юм хийж Монголыг хорлож байгаа хүмүүстэй яаж эрүүл саруул ухаанаар ярих юм. Энэ бол боломжгүй зүйл.
Амиа хоохойлохын тулд л Монголчуудыг хорлох юм хийдэг. Энэ хүмүүс яагаад Монгол ийм өстэй байдаг юм. Яагаад Монголчуудад өширхөөд байдаг юм. Ганцхан шалтгаан байгаа. Шуналаасаа болж, Кремльд дүүжлүүрийн олсонд орж, нохой амиа аврахын тулд л Монголчуудыг хорлодог.
Бидэнд ийм түүх бий. Х.Чойбалсан гэдэг хүн нохой амиа авч үлдэхийн тулд хэчнээн мянган хүний амь насыг хороолоо. Ю.Цэдэнбал гэдэг хүн хэчнээн мянган хүмүүсийг хэлмэгдүүлж, нохой амиа авч үлдэж, дараа нь Оростоо очиж алууллаа. Тэгвэл түүнтэй адил Х.Баттулга энэ нохой амиа авч үлдэхийн тулд л Монголчуудыг хорлож байна. Тийм учраас би С.Ганбаатар, Х.Баттулга нарт тоо баримт фактаа гаргаж ирээд мэтгэлцэе гэж хэлдэг.
-АН дотроо ингэж хоёр хуваагдаад байгааг та юу гэж дүгнэх вэ?
-Би анхнаасаа АН-ыг хуваагдаад яваасай л гэж хүссэн. Би Л.Гантөмөрийг намын дарга болсны дараа ч хэлж байсан. Гантөмөр өө одоо энэ популистууд, нацистуудаасаа салахгүй юм уу гэж. Наад хөх туг намируулаад яваад байгаа цэвэр цус нөж ярьж Монголчуудыг хооронд нь алалцуулаад байгаа энэ хүмүүсээ зайлуулахгүй юм уу гэж хэлсэн. Л.Гантөмөр надад юу гэж хэлсэн гэхээр тэр юм ойлгодоггүй харанхуй масс, улныхан чинь Х.Баттулгад хайртай байгаад байна. Тэгээд тэр массын саналыг авахын тулд энэ хүнийг байлгахаас өөр аргагүй байна гэсэн. Би бол эсрэгээрээ байсан.
Тэр улныхан тэр Х.Баттулгатайгаа хамт МАН-тайгаа хамт явдаг л юм байгаа биз. Би иргэдийг эрүүл саруул ухаантай гэдэгт итгэж найддаг. Тэгээд тэр Х.Баттулгыг хайрлаад байгаа улныхных нь амьдрал өдрөөс өдөрт доройтох нь ойлгомжтой.
Одоо Хятадууд нүүрс худалдан авах нь өдрөөс өдөрт багасч байна. Юмны үнэ өсч байна. Нөгөө худалдан авах чадвар муутай хэсгийнхний амьдрал улам л хүнд болно. Түүнээс биш энэ баян чинээлэг хэсэгт тэр зовлон нэг их ирэхгүй. Яг ийм үе дээр нь энэ коммунистууд ангийн хувьсгал хийх гэж оролддог.
Монголд яг ийм юм хийх гээд санаачлаад уриалаад байгаа хүн бол Х.Баттулга, Л.Оюун-Эрдэнэ нар. Хөрөнгө мөнгөтэй болсон хэсгийг нь ангийн дайсан болгоод эд нарын өмчийг дээрэмдэж авья гэдэг юм руу уриалаад байна. Энэ бол Монголчуудыг талцан хувааж нэгийг нь нөгөөгөөр нь хөнөөлгөдөг Оросуудын л технологи. Ийм юмыг бид нар даван туулаад гарсан. Би нарын түүх, гашуун сургамж үүнийг баталдаг. Гэтэл үүнийг дахиж давтах гээд яваад байна.
Та АН-ын гишүүний хувьд Ерөнхийлөгч асан Х.Баттулгад хандаж юу гэж хэлэх вэ? Микрофон нээлттэй байна?
Би УИХ-ын гишүүн Х.Баттулгыг Монголд битгий гай болоод гэж хэлмээр байна. Тэртээ тэргүй чи Оростоо л очиж алуулна. Зүгээр л нохой амиа өгөөд эртхэн шиг үхэж далд орооч. Монголчуудад битгий ингэж гай болооч, Монголчуудын хувь тавилан, маргаашийг нь битгий булааж авч, Монгол Улсыг битгий хорлооч гэж хэлмээр байна. Чи яагаад Монголд ингэж их өширхөөд байдаг юм. Мөн би УИХ-ын гишүүн С.Ганбаатар, Х.Баттулга нарыг та нарын хүссэн телевиз дээр чинь очоод ямар нэгэн эвлүүлэггүй мэтгэлцэе гэж уриалж байна.
Ярилцсан У.Анударь
