ВАШИНГТОН, 2025 оны дөрөвдүгээр сарын 8 /CNN/. Хятадын тал хариу татвар ногдуулахаа өнгөрсөн долоо хоногт мэдэгдсэнтэй холбогдуулан тус улсын бараанд шинээр 50 хувийн татвар ногдуулахад бэлэн гэдгээ АНУ-ын Ерөнхийлөгч Дональд Трамп даваа гарагт мэдэгдсэн нь хөрөнгийн зах зээлийг доргиож буй дэлхийн худалдааны дайныг улам хурцатгажээ.
Д.Трамп хэлэхдээ, Хятад улс мягмар гараг гэхэд 34 хувийн хариу татвараа цуцлахгүй бол нэмэлт тариф энэ долоо хоногийн дундуур хэрэгжиж эхэлнэ гэлээ. Тэрбээр мөн Хятадын талаас хүсэлт гаргасан уулзалтуудыг цуцална гэж мэдэгдсэн боловч бусад улс орнуудтай худалдааны талаар нэн даруй хэлэлцээ хийж эхэлнэ гэсэн байна.
“АНУ-ын эсрэг хариу арга хэмжээ авсан аливаа улсад нэн даруй шинэ, үлэмж өндөр тариф ногдуулна гэж мэдэгдсэнийг үл харгалзан Хятад улс өмнө нь байгаагүй өндөр тариф, шууд бус тариф тогтоож, компаниудад хууль бусаар татаас олгож, валютын манипуляц хийсээр ирсэн атлаа нэмж 34 хувийн хариу татвар ногдуулахаа өчигдөр мэдэгдлээ. Тиймээс маргааш буюу 2025 оны дөрөвдүгээр сарын 8-ны өдөр гэхэд Хятад улс нэмэлт 34 хувийн татвар ногдуулах шийдвэрээ цуцлахгүй бол АНУ дөрөвдүгээр сарын 9-нөөс эхлэн Хятадад 50 хувийн нэмэлт татвар ногдуулна. Үүнээс гадна Хятад улсаас бидэнтэй уулзах хүсэлт тавьсан бүх яриа хэлэлцээг цуцлах болно! Харин уулзах хүсэлт гаргасан бусад улстай нэн даруй хэлэлцээ хийж эхэлнэ. Энэ асуудалд анхаарал хандуулсанд баярлалаа!” гэж Д.Трамп Truth Social сүлжээнд бичжээ.
Д.Трамп нэгдүгээр сард Цагаан ордонд эргэн ирснээсээ хойш Хятадын бүх бараанд хоёр ч удаа 10 хувийн нэмэлт татвар ногдуулсан юм. Тус улсаас АНУ руу нийлүүлж буй хууль бус фентанилын урсгалыг зогсоохын тулд ийм шийдвэр гаргасан гэж Цагаан ордон мэдэгдэж байлаа.
Өнгөрсөн долоо хоногт Д.Трамп Хятадын бүх бараанд нэмэлт 34 хувийн татвар ногдуулахаа мэдэгдсэн бөгөөд энэ шийдвэр лхагва гаргаас хэрэгжиж эхэлнэ. Хэрэв түүний мэдэгдсэнчлэн 50 хувийн нэмэлт татвар ногдуулах шийдвэр хүчин төгөлдөр болбол АНУ-д нийлүүлж буй Хятадын бараа бүтээгдэхүүнд нийт 104 хувийн татвар ногдуулна.
Э.Хулан
Эх сурвалж: "Монцамэ" агентлаг
Сэтгэгдэл (1)
Анхаар!
Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд хариуцлага хүлээхгүй. !!!