2024.01.18 Иргэн Ц сураггүй алга болов /Энэ өдөр талийгаач хамгийн сүүлийн удаа гэрийнхэнтэйгээ холбогджээ/
2024.02.21 Ц сураггүй алга болсон тухай ар гэрийнхэн нь цагдаад мэдээлэв / Утас руу нь залгах бүрт хамтран амьдрагч нь дуудлагыг авч, талийгаачийн өмнөөс ээж рүү нь зурвас бичдэг байжээ. Бичилтийн хэв маяг нь өөр санагдсан тул гэрт нь очиж үзэхэд, хохирогч байгаагүй тул цагдаа дуудсан/
2024.02.23 Ц-ийн хамтран амьдрагч Б-г эрүүгийн хуулийн тусгай ангийн 20.7.2-т зааснаар эрүүгийн хэрэг үүсгэж, яллагдагчаар татав / Яллагдагч Б-ын машин болон байшингаас их хэмжээний мансууруулах бодис илрүүлсэн, талийгаачийн цогцос олдоогүй хүнийх байж болзошгүй яс олдсон/
Хэргийг эргэн сануулахад, Хан-Уул дүүргийн 13-р хорооны …дугаар гудамжны …дугаар тоотод оршин суух иргэн Б гэх 47 настай эрэгтэй хүнтэй хамт амьдарч байсан иргэн Ц нь ар гэрийнхэнтэй холбоо барихгүй байсан учраас гэрийнхэн нь санаа зовж, удаа дараалан холбогдох оролдого хийжээ. Гэвч гар утсыг нь хамтран амьдрагч нь өмнөөс нь авч, ариун цэврийн өрөө орсон, сургалтад сууж байгаа гэх мэтээр хариулж байсан байна.Улмаар ар гэрийнхэн нь бүсгүй рүү зурвас бичихэд талийгаач эмэгтэйн өмнөөс өөр хүн хариулж байж болзошгүй сэжигтэй санагдсан тул гэрт нь очжээ. Тухайн үед Ц гэртээ харагдахгүй, хамтран амьдрагч Б машиндаа байсан бөгөөд эгч нь дүүгээ сураглах үед гэртээ харихаар явсан гэжээ. Гэтэл явсан гэж тэдэнд хэлсэн өдрүүдэд гэмт хэрэгтэн Б-нь Ц-г хамт байгаа мэт ярьж байсан нь сэжигтэй байсан тул цагдаагийн байгууллагад хандсан байна. Улмаар цагдаагийнхан хойшлуулшгүй ажиллагаа явуулж, хэрэгтний гэрт нэвтрэх үед байшингийн цонхнуудын хөшиг хаалттай, байшин харанхуй, хашаан дотор олон тооны ноход сул байсан. Хэргийн газарт үзлэг хийх үед хүнийх байж болзошгүй яс байсан тул ШШҮГ-т шинжлүүлжээ. Тухайн ясны ДНХ хохирогчийн ээжийнхтэй таарсан бөгөөд энэхүү яс талийгаач Ц-ийнх гэдэг нь тодорхой болсон. Энэ зуур дээрх мэдээг сонссон талийгаачийн ээжийн бие муудаж, ар гэрийнхэн нь цочролд орсон. Талийгаач цовоо цайлган зантай, бусдын хайрыг татсан нэгэн байлаа. Гэмт хэрэгтэн өмнө нь хоёр удаа амьдрал зохиож, эхнэрүүдийнхээ биед халддаг байсан тухай мэдүүлэг шүүх хурлын үеэр танилцуулагдсан юм.Сэжигтэн Б Мансууруулах бодис хэрэглэсэн байсан учраас тухайн өдрүүдийг санахгүй байна гэж мэдүүлсэн боловч тэжээж байсан үүлдрийн хэдэн нохой байсан, хэдэн гөлөг байсныг маш сайн санаж, тэдгээрийг зарж борлуулахыг хүссэн нь анхаарал татна. Гэмт хэрэгтэн Б эхнэрээ хөнөөгөөд цогцсыг нь мөчилж, нохойд өгсөн гэх энэ хэргийн эцсийн шатны шүүх хурал лхагва гарагт буюу энэ сарын 16-ны өдөр болж бүх насаар нь хорих анхан шатны шүүхийн шийдвэрийг хэвээр үлдээлээ . Хэргийн гэм бурууг шүүх хурлын анхан шатны шүүх өнгөрсөн оны 8 сарын 30-нд болж, хэрэгтэнд хаалттай хорих ангид бүх насаар нь хорих ял оногдуулсан байдаг.Гэмт хэрэгтэн Б-д Эрүүгийн хуулийн тусгай ангийн 20.7 дугаар зүйлийн 2, 10.1 дүгээр зүйлийн 2.1 , 2,8 дугаар зүйлийг үндэслэн шийдвэрийг гаргажээ. Хохирогчийн ар гэрийнхний хувьд өнгөрсөн хугацаанд сэтгэлзүйн хүнд үеийг даван туулсан бөгөөд эхнээс нь эцсээ хүртэл тууштай ажилласан Р.Булгамаа өмгөөлөгчид талархаж байгаагаа илэрхийлсэн юм.
Newsroom.mn
