УИХ дахь Ардчилсан намын бүлэг хуралдлаа. Ээлжит хуралдаанаас дараах шийдвэрийг гаргалаа.
- Нэгдүгээрт Монгол Улсын Ерөнхий сайд Л.Оюун-Эрдэнэ Чуулганы нэгдсэн хуралдаанд УИХ-ын гишүүн Ж.Баярмааг “Баярцогт дарга” гэж санаатайгаар гүтгэн доромжлон хэлсэн үгэндээ уучлал гуйх хүртэл хугацаанд Улсын Их Хурлын чуулган, Байнгын хорооны хуралдаанаас Ардчилсан намын бүлэг завсарлага авах чиглэлийг Улсын Их Хурал дахь Ардчилсан намын бүлгийн удирдлагад өгөв.
- Хоёрдугаарт тус асуудалтай холбоотойгоор парламентын ардчиллыг бэхжүүлэх, бататгах чиглэлээр Монгол Улсын Их Хурлын чуулганы дэгийн тухай хуульд нэмэлт, өөрчлөлт оруулах хуулийн төсөл боловсруулж, Улсын Их Хурлын дарга Д.Амарбаясгаланд өргөн мэдүүлэхийг Улсын Их Хурал дахь Ардчилсан намын бүлгийн дарга О.Цогтгэрэл, дэд дарга Х.Тэмүүжин нарт даалгав.
- Гуравдугаарт энэхүү шийдвэрийг Улсын Их Хурлын дарга Д.Амарбаясгаланд мэдэгдэх, Улсын Их Хурлын чуулганы хуралдаанд Ерөнхий сайд Л.Оюун-Эрдэнийг оролцуулж уучлал гуйлгах ажлыг зохион байгуулах, Монгол Улсын Их Хурлын чуулганы хуралдааны дэгийн тухай хуулийн төслийг яаралтай горимоор хэлэлцүүлэхийг Улсын Их Хурлын дарга Д.Амарбаясгалангаас шаардахыг Улсын Их Хурал дахь Ардчилсан намын бүлгийн дарга О.Цогтгэрэл, дэд дарга Х.Тэмүүжин нарт даалгав.
