УИХ-ын гишүүн Э.Болормаа 2024 оны УИХ-ын сонгуулийн үеэр гадаадын хөрөнгө оруулалттай “Ханбогд эксплорэйшн” ХХК-аас 30 сая төгрөгийн хандив авсан байдаг. Гадаадын хөрөнгө оруулалттай хуулийн этгээдээс хандив авах нь хуулиар хориотой. Тиймээс түүнийг шалгаж эхэлсэн. Гэвч хэргийн харьяалал нь Ховд аймаг руу шилжээд зогсохгүй сунжирч байгаа аж.

Хуульч Б.Мэргэн энэ талаар “Хууль бус хандив авсан зөрчлийн хэрэг нь харьяалал тогтооно гэж Хан-Уул дүүрэг рүү ч нэг явсаар одоо бүр Ховд руу шилжчхэж. Компаниас Ховдод очоод данс руу нь хийгээгүй, хотод байхдаа л хийсэн байлгүй. СБД-т байрладаг компани гэхээр тэндээс шилжүүлсэн байх магадлалтай.

СЕХ, ҮАГ, “Ханбогд эксплорэйшн” ХХК, дүгнэлт гаргасан аудитын компанийн хүмүүс, Э.Болормаагаас өөрөөс нь мэдүүлэг, дансны хуулгыг аваад л болчих хэрэг сар гаруй болоход ахидаггүй ээ.

Уг нь зөрчлийн хэргийг шалгах үндсэн хугацаа нь 14 хоног, нэмж 14, 30 хоног сунгавал 58 хоног юм. Хоног нь дөхөж л байх шиг. Хугацаа дуусвал зөрчил мөн байсан ч хэрэг нь хаагдана. Хэрвээ хугацаа дуусгавал санаатай дуусгасан байж болзошгүй гэж эрх бүхий албан тушаалтнуудыг нь АТГ-д өгөх гарц л үлдэнэ” гэв.

Түүнчлэн хуульч Б.Мэргэн “Э.Болормаа гишүүний 30 сая төгрөгийн хандив авсан “Ханбогд эксплорэйшн” ХХК нь түүний сонгогдсон тойрог болох Завхан аймагт 2 ширхэг хайгуулын тусгай зөвшөөрөл эзэмшдэг. Нэг тусгай зөвшөөрөл нь сонгуулийн дараа буюу 2024 оны 10 сард хугацаа дуусна гэж АМГТГ-ын цахим хуудаст зарлагдсан ч хүчин төгөлдөр гэсэн ангилалд өнөөдөр ч байна гэхээр сонгуулийн дараа сунгагдсан бололтой” гэв.

Говь-Алтай, Завхан, Увс, Ховд буюу сонгуулийн II тойргоос 139476 иргэний санал авч сонгогдсон УИХ-ын гишүүн Э.Болормаад 2024 оны УИХ-ын сонгуулиар гадаадын хөрөнгө оруулалттай “Ханбогд эксплорэйшн” ХХК-аас 30 сая төгрөгийн хандив өгсөн нь ҮАГ-ын дараах тайлангаас тодорхой харагддаг.

“Ханбогд эксплорэйшн” ХХК-ийн гүйцэтгэх захирлаар Ганболдын Золбаяр ажилладаг, зөвлөгөө өгөх, бөөний худалдаа эрхлэхээс гадна ашигт малтмалын хайгуул хийх чиглэлээр үйл ажиллагаа явуулдаг. Тус компанийн эцсийн өмчлөгчөөр гадаадын Kuok Khoon Hua нарын таван иргэн бүртгэлтэй байна. Мөн тус компани уул уурхайн хайгуулын тусгай хоёр зөвшөөрөл эзэмшдэг.