Монгол Улсын Ерөнхий Сайд Л.Оюун-Эрдэнэ өнөөдөр Туулын хурдны замын бүтээн байгуулалтын үйл явцтай танилцлаа. Энэ үеэрээ хүүтэй нь холбоотой үүссэн дуулианд хариу өгөв.

Тодруулбал тэрээр: “Манай хүү 23 настай, найз охинтой болсон нь үнэн. Аав ээжтэй нь уулзаж, танилцаж амжаагүй явна. Хайр сэтгэлийн асуудалд нь хүндэтгэлтэй хандана. Үүссэн асуудлаар хүүтэйгээ ярьсан. Олон нийтийн зүгээс тавьж байгаа шүүмжлэл зөв зүйтэй. Хүн бүр хуулийн өмнө тэгш байх ёстой. Орлогоо нотлох ёстой. Сүй тавих гэж байгаа, надад мөнгө хэрэгтэй байна гэж хүү маань яриагүй. Говьд ажиллаж байхад хүү найз охинтой болсон байна. Одоо аав ээжтэй нь аав хүний хувьд ярилцах ёстой болж байна. Бөгж авч өгсөн нь үнэн байна. Орлогоо нотлох байдал үүсэж байгааг хэлсэн.

Манай хүү багаасаа аялах сонирхолтой, аялал жуулчлалын чиглэлээр сурах, ажиллах хүсэлтэйгээ хэлдэг. Миний ХОМ-д мэдүүлсэн "Херо энтартайнмент"-тэй хамтарч, тэнд контентын ажил хийдэг.

Хүүгийнхээ амьдрах орон зайд халдахгүй. Хүүдээ орлогоо нотлох ёстойг хэлсэн. Орлогоо нотолж чадахгүй бол сүйн бөгж байсан ч хураалгана. Нийтийн зүгээс гаргаж байгаа шаардлага зөв. Энэ шаардлагад хүндэтгэлтэй, сайшаалтай хандаж байна. Мөн ийм асуудал гаргасанд хүлцэл өчиж, уучлалт гуйж байна.. Надаас хууль бус сэтэрхий тэвэн, сиймхий хадаг олдвол хариуцлага хүлээхэд би бүрэн бэлэн байна. Миний дүү контентын бизнес хийж мөнгө олдог. Хүү маань олонд танигдсанд баяртай байна. Энэ асуудлыг улс төрийн зорилгоор ашиглах гэж байгаа ялаанууд байгаа. Энэ ялаануудад хандаж хэлэхэд битгий горьд” гэсэн юм.

С.Сарнай