Манай улсад тулгамддаг томоохон асуудал бол агаарын бохирдол. Олон жилийн хугацаанд яригдсан утааны асуудал жил бүрийн дулааны улиралд мартагдаж харин хүйтний улирал эхлэхтэй зэрэгцээд л гарц, шийдэл, ярьсаар олон жил өнгөрсөн байна. Тэгвэл дулаалгаар утааг шийдэх санаачилга бүхий “Дулаанбаатар” аяныг эхлүүлж буй талаар тус төслийг боловсруулсан ажлын хэсгийн гишүүд мэдээлэл хийлээ.
УИХ-ын даргын 85 дугаар захирамжаар байгуулагдсан “Ногоон санхүүгийн тогтолцоог байгуулах” ажлын хэсгийг УИХ-ын гишүүн Г.Лувсанжамц ахалж ажилласан юм. Ийнхүү УИХ-ын гишүүдийн олонх дэмжсэнээр ногоон санхүүжилтийн тогтолцоо боловсронгуй болж цаашид гэр, байшингаа дулаалах санхүүгийн хөшүүрэг, хууль эрх зүйн орчныг зөв болгох ажлуудын суурь тавигдаж байна. Энэ талаар УИХ-ын гишүүн Г.Лувсанжамц “Дулаанбаатар” аян 2028 хүртэл үргэлжилнэ. Дулаан цаг ирсэн гээд бид утаагүй мартаж болохгүй. Өвлөөс урьтаж дулаалгын ажлаа эрчимжүүлэх ёстой. Агаарын бохирдлыг дулаалгаар шийдэх боломжтой. Өнөөдрийг хүртэл түлш буюу шатдаг материал дээр татаас олгож төрийн бодлогоор дэмжиж ирсэн бол үүнээс цааш төрийн бодлого дулаалга буюу хэмнэлтийг дэмжих бодлого руу чиглэхээр том өөрчлөлтийг хийж байгаа гэдгээрээ онцлог” гэлээ.
УИХ-ын гишүүн О.Саранчулуун “Дулаанбаатар” аяныг дэмжиж оролцож байгаа. Яагаад гэхээр, гэр хороололд амьдардаг хүмүүсийн нэлээд их хувь нь бага орлоготой өрх, хөгжлийн бэрхшээлтэй хүмүүс, ахмад настнууд байдаг. Тэгвэл энэ аяны хүрээнд яригдаж буй “Best ger” гэсэн барилгын шалгуур нь хүртээмжтэй болж чадсан. Гэр хороололд амьдардаг хөгжлийн бэрхшээлтэй иргэд надаар дамжуулан аяны талаар мэдээлэл авч болно. УИХ-ын гишүүний хувьд олныг хамарсан аянд оролцож, хүртээмжийн талаар дуугарч саналуудаа оруулж байгаа гэдгийг дуулгая” гэсэн юм.
“Дулаанбаатар” аяны уриалгыг орон нутагт ч дэмжиж, төсөвтөө уг асуудлыг авч хэлэлцэхийг уриалж байна гэдгийг УИХ-ын гишүүн П.Сайнзориг хэллээ. Тэрээр “Ногоон санхүүжилтийн тогтолцооны цаана урт хугацаандаа газрын гүний дулааныг ашиглах Монгол Улсын байгалийн нөөц баялгийг зөв зохистой ашиглах бодлого ч гэсэн явж байгаа. Тиймээс урт, дунд, ойрын хугацаанд авч хэрэгжүүлэх арга хэмжээний бүх зүйлүүдийг тусгасан. Мөн энэ тогтоолыг хэрэгжүүлэх ажилд Монголбанк болон орон нутгийнхнаа Засгийн газартай хамтарч ажиллаасай гэдгийг уриалж байна” гэдгийг хэллээ.
Харин УИХ-ын гишүүн Б.Бат-Эрдэнэ “Монгол Улсын парламент дахь Байгаль хамгааллын бүлгэм байдаг. НҮБ-ын хөгжлийн хөтөлбөрт ногоон зээлийн санхүүжилттэй холбоотой өнгөрсөн хугацаанд 50 гаруй сая, ам.долларыг арилжааны банкуудаар дамжуулж олгосон. Энэ тогтоол батлагдсанаар зөв тал руугаа шилжих боломжууд бүрдэж байна. Хоёрдугаарт, Ази Номхон далайн 53 орон бий. НҮБ-ын хөгжлийн хөтөлбөрт ногоон зээлийн санхүүжилттэй холбоотой асуудлаар цаашдаа өөр түвшинд агуулгыг гаргаж ажиллах боломж өнөөдрөөс бүрдэж байна” гэсэн юм.
Эх сурвалж: “Зууны мэдээ” сонин
2025 ОНЫ ЗУРГААДУГААР САРЫН 20. БААСАН ГАРАГ. № 115 (7612)
