Ерөнхийлөгч У.Хүрэлсүхийн урилгаар Япон Улсын Цог Жавхлант Эзэн Хаан Нарүхито, Эрхэм дээд Хатан Масако нар 2025 оны долоодугаар сарын 6-13-нд Монгол Улсад төрийн айлчлал хийж буй. Айлчлалын эхэнд Япон Улсын Цог Жавхлант Эзэн Хаан Нарүхито болон Эрхэм дээд Хатан Масако нарыг Үндэсний их баяр наадмын нээлт болон бусад ёслолын ажиллагаанд хүндэт зочдын хувиар оролцоно гэдгийг мэдэгдэж байсан билээ.
Тэгвэл тэд өнөөдөр монгол түмний Үндэсний их баяр наадмыг үзэж сонирхож байна. Төв цэнгэлдэх хүрээлэнд хүрэлцэн ирэхэд Монгол Улсын Ерөнхийлөгч У.Хүрэлсүх тосож авлаа.
Япон Улсын Цог Жавхлант Эзэн Хаан Нарүхито 2019 оны 05 дугаар сарын 01-ний өдөр хаан ширээндээ заларч, мөн өдрөөс Япон Улсад “Рэйва” (Үзэсгэлэнт зохицол) он тоолол эхэлсэн. Цог Жавхлант Эзэн Хаан Нарүхито хаан сэнтийдээ заларснаас хойш 2023 онд Бүгд Найрамдах Индонез Улс, 2024 онд Их Британи, Умард Ирландын Нэгдсэн Хаант Улсад айлчилсан бөгөөд төрийн гурав дахь айлчлалаа Монгол Улсад хийж байгаа юм.
Эх сурвалж:www.polit.mn
