2021 оны эхэнд Засгийн газрын жолоог гартаа авсан Лувсаннамсрайн Оюун-Эрдэнэ тухайн үедээ “Шинэ сэргэлтийн бодлого”, “Цахим Монгол”, “Төрийн бүтээмж”, “Залуусын улс төр” зэрэг гоё өнгө, амбицтай уриа лоозонг тунхаглаж, нийтэд шинэлэг имижтэй залуу Ерөнхий сайд хэмээн харагдаж байлаа. Гэвч цаг хугацаа өнгөрөх тусам популизм бодит эдийн засгийн дарамтыг дааж чаддаггүйг Монгол Улсын ард түмэн дахиад л харж сууна.
Хэрвээ Л.Оюун-Эрдэнэ Хэнтий аймгийн ямар ч сумын билээ, жижүүр хэвээрээ үлдэж, өөрийнхөө чадахгүй зүйлээр оролдолгүй явж байсан бол Монгол Улсад эдийн засгийн хямрал нүүрлээч үү, үгүй ч үү.
Л.Оюун-Эрдэнэ Ерөнхий сайд болонгуутаа улс орны эдийн засаг, гадаад харилцаа, төрийн бодлого гэдэг нь сошиал поп мессеж, пиар хоёрын нийлбэр гэж андуурсан мэт сэтгэгдэл төрүүлсээр ирсэн. "Боомтын сэргэлт", "Уул уурхайн супер цикл", "Хөгжлийн банкийг цэвэрлэнэ" гэх зэрэг пиар хэллэгүүд эхэндээ олны анхаарал татаж байсан ч бодит үр дүн, зохион байгуулалтын түвшиндээ тэгтэй тэнцүү шахуу байв.
2021–2024 оны хооронд Монгол Улсын эдийн засаг нэрлэсэн дүнгээр өссөн ч иргэдийн бодит орлого буурч, ам.долларын ханш тогтмол өсөж, инфляц тасралтгүй “айдас” болж хувирсан. Ард иргэдийн хувьд мах, гурил, шатахуунаа ч зээлээр авдаг үе ирсэн бол төр хувийн хэвшлийг дарамталдаг, хөрөнгө оруулагчдыг үргэдэг системийн хандлагаа өөрчилж чадсангүй.
Төсвийн алдагдал түүхэн дээд цэгт хүрч, төгрөгийн ханш ₮3,600 давж, Засгийн газрын өр 40 их наяд төгрөгт тулсан энэ үед, Монгол Улс дахин “улстөрчдийн туршилтын талбай” болж хувирсан мэт. Төрийн нэр хүнд унаж, иргэдийн ирээдүйдээ итгэх итгэл ганхаж байна. Харин Ерөнхий сайд асан Л.Оюун-Эрдэнэ "Түүхэн дэх хамгийн их хөрөнгө оруулалт татлаа" гэж хэлж сууна. Гэтэл тэр хөрөнгө оруулалт хаашаа орж, хэний халаасанд шингэж байгааг ард түмэн мэдэхгүй.
Монгол Улсад өнөөдөр пиараас илүү бодлого, тунхаглал биш бүтэц, популизмаас илүү прагматик хандлага дутагдаж байна. Хэрвээ Л.Оюун-Эрдэнэ үнэхээр хүлээцтэй, даруухан байж, боловсроогүй гэдгээ хүлээн зөвшөөрч, яаран Ерөнхий Сайд бололгүй, туршлагатай удирдагчдаас суралцсан бол, магадгүй өнөөдрийн эдийн засаг ийм байдалд хүрэхгүй ч байсан юм бил үү?
Н.Отгон
