Монгол Улсын хууль тогтоомжид улс төрийн нам, сонгуульд нэр дэвшигч гадаадын этгээдээс хандив авахыг хатуу хориглодог. Энэ нь Монгол төрийн тусгаар тогтнол, ардчиллын үнэт зүйлсийг хамгаалах гол хамгаалалт юм. Гэтэл Үндэсний аудитын газрын тайланд дурьдсанаар, УИХ-ын гишүүн Э.Болормаа 2024 оны сонгуулийн үеэр Их Британи, Умард Ирландын Нэгдсэн Вант Улсад бүртгэлтэй “Кью Жи Экс Холдингс Лимитед” компанийн 100 хувийн хөрөнгө оруулалттай “Ханбогд Эксплорайшн” ХХК-иас хууль бус хандив авсан нь баримтаар нотлогдоод байна.
Уг асуудлыг эхлээд Цагдаагийн Ерөнхий газрын Хэрэг бүртгэх алба шалгаж, улмаар харьяаллын дагуу Ховд аймгийн цагдаагийн газарт шилжүүлсэн боловч хэргийг дахин Мөрдөн байцаах албанд шилжүүлж, шалгаж буй нь анхаарал татаж байна. Монголын түүхэнд гадаадын компаниас шууд хандив авч, УИХ-ын гишүүн байгаагүй нь энэ хэрэг ямар ноцтой болохыг харуулж буй билээ.
Гадаадын хөрөнгө, сонирхлын өмнө Монголын төрийг барьцаалах оролдлого гарч буйг хүлээн зөвшөөрөх аргагүй. Ард иргэдийн итгэл, сонгогчдын дэмжлэгээр төрд ажиллах ёстой хүн хууль бус аргаар гарч ирсэн бол “усны эх булингартай бол адаг нь булингартай” гэсэн ардын үг ёсоор цаашид улс оронд зөв зүйл хийх нь тун эргэлзээтэй.
Иймд Э.Болормаа өөрийн бүрэн эрхээс сайн дураараа түдгэлзэж, хуулийн байгууллагын ажиллагаанд саад учруулахгүйгээр шалгуулах ёстой. Хэрэв гадаадын компаниас хандив авсан нь эцэслэн шүүхээр тогтоогдвол тэрээр Монгол төрөөс бүрмөсөн зайлах нь шударга ёсонд нийцнэ. Монголын ардчиллыг мөнгөний нөлөө, гаднын сонирхлоор бохирдуулах оролдлогыг үл тэвчих нь нийт Монголчуудын үүрэг юм.
Э.Солонго Sonin.mn
