Лувсаннамсрайн Оюун-Эрдэнэ гэдэг хүн Монгол Улсын Ерөнхий сайдаар бүтэн дөрвөн жил ажилласан. Жилээр нь бус сараар нь тоолбол, 1992 оноос хойших шинэ үеийн түүхэнд хамгийн удаан хугацаанд Ерөнхий сайдын албыг хашсан хүн болж байна. Гэвч энэ урт хугацаанд ард түмний нүдэнд харагдахуйц бодит үр дүн, сэтгэлд хүрсэн бүтээн байгуулалт бараг хийгдсэнгүй.

Анхнаасаа сүржин уриа, гоё нэртэй хөтөлбөрүүдээр “Таван Ш”, “Шинэ сэргэлтийн бодлого” гэхчилэн шоу хийж эхэлсэн ч бодит байдал дээр ард түмэн юу хүртэв? “Таван Ш”-ийн хүрээнд өмнөх Ерөнхий сайд Ч.Сайханбилэгийг эх оронд авчирна гэж сүр дуулиантай амлаж байсан.

Гэвч бодит байдал дээр юу болов? Өөрийн намын нөхөр- нүүрсний хулгайн сэжигтэн Н.Удаанжаргалыг ч авчирч чадсангүй. Ийнхүү сүржин эхлэлүүд хий хоосон уриа болон замхрав. Эдийн засгийн тал дээр бүр ч эмгэнэлтэй дүр зураг харагдана. Өнгөрсөн дөрвөн жилд эдийн засаг бодитоор 30 орчим хувиар уруудсан нь нүдэн дээр ил.

“Бүсчилсэн хөгжил”, “Хөдөөгийн сэргэлт” гэх мэтээр гоё нэртэй санаачилгууд бүгд цаасан дээр үлдэж, бодит амьдралд өөрчлөлт авчирсангүй. Ард иргэдийн амьдрал сайжрахын оронд улам хүндэрч, өр зээлд баригдсан нь үнэн.

Тэр бүү хэл "HERO"-гийн Баатар гэгч ахтайгаа хамтран бусдын эд хөрөнгийг дээрэмдсэн байж магадгүй тухай аймшигтай мэдээллийг УИХ-ын гишүүн өчигдөр дэлгэв. Эцэст нь Ерөнхий сайд өөрөө биш, харин хүү, бэрийнх нь тансаг хэрэглээ улс төрийн амьдралд нь цэг тавьсан.

Ард түмний бухимдлыг төрүүлсэн тансаглал түүнийг суудлаас нь буулгасан. Балба улсад яг ийм нөхцөл байдалд хүрч, эрх баригчдын тансаг хэрэглээг залуу үеийнхэн тэвчилгүй бослого гарган, зодож, хөөн зайлуулсан байдаг. Үүнтэй харьцуулахад Л.Оюун-Эрдэнэд Монголчууд маш зөөлөн хандсан, хуулийн дагуу огцруулаад л явуулсан. Тиймээс ч Лувсаннамсрайн Оюун-Эрдэнэ “Непалдуулаагүйдээ” насан туршдаа баярлаж явах ёстой. Монголчуудын тэвчээр, хүлээц, зөөлөн занг тэр нэг насандаа тохиосон ховорхон аз гэж ойлгох учиртай.

Ч.Явуу