УИХ-ын даргыг унагаах уу, Засгийн газрыг огцруулах уу гэдэг дээр Төрийн ордныхон хоёр талцаад, Монголын төр хөл толгойгоо олохоо болилоо. Ерөнхий сайдыг огцруулах бичгийг УИХ-ын гишүүн П.Сайнзориг, Х.Баасанжаргал, Г.Лувсанжамц, О.Саранчулуун тэргүүтэй гишүүд УИХ-д өргөн мэдүүлсэн. Хуулийн дагуу гурав хоногийн дотор парламентаар хэлэлцүүлэх зохицуулалтай. Тэгвэл өнөөдөр уг асуудлыг Төрийн байгуулалтын байнгын хорооны хуралдаанаар хэлэлцэх тов тогтоож, маргааш УИХ-ын чуулганы хуралдаанд оруулах болов уу гэсэн хүлээлт байна.
Чуулганы хуралдаанаар Ерөнхий сайдыг огцруулах асуудал орж ирвэл Төрийн гурван өндөрлөг чуулганы индэр дээрээс нүүр тулах цаг болсон гэсэн үг. Нэг ёсондоо Төрийн тэргүүнүүд тэрсэлдэж эхэлсэн энэ тэмцлийн хайнааг Ерөнхийлөгч У.Хүрэлсүх хагална.
Эргээд улс төрд өрнөсөн үйл явдлуудыг санахад Ерөнхий сайд Л.Оюун-Эрдэнийн Засгийн газрыг огцруулах асуудлыг хэлэлцэж байхад Төрийн ордныхон мөн л түнжин муутай хоёр хуваагдсан байв. Шөнө дөл хүртэл хуралдаж, шийдвэрт хүрч чадахааргүй болчихсон байсан ч Ерөнхийлөгч чуулганы хуралдаанд орж, Ерөнхий сайд, УИХ-ын дарга хоёрыг тас загинаад хайрцагнаасаа хальж, дүрдээ орж явсан гишүүдийг ч байранд нь тавьж, хайнааг хагалсан.
Тэгвэл энэ удаад Ерөнхийлөгч чуулганы хуралдаанд юу гэх нь олны анхааралд байна. Улс төрд өрнөж буй үйл явдал, олон нийтийн хэрэгслээр бичиж эхэлсэн мэдээллээр Ерөнхийлөгч УИХ-ын дарга, Ерөнхий сайд нарыг өнөөдрийг хүртэл хэнийг нь хэн гэхгүй хоорондоо учраа ол гэчихсэн тул хөл толгойгүй бужигнаж гэх мэдээллүүд ч гаргаж эхэлсэн. УИХ-ын дарга Ерөнхий сайд хоёрын улс төрийн зодоон ганцхан МАН-ын зодон байхаа болиод удлаа. Сөрөг хүчин гэгдэх Ардчилсан намынхан гэхэд л хоёр хуваагдсан. УИХ-ын даргад хариуцлага тооцох гарын үсэгт О.Цогтгэрэлийн бүлэглэлийн 28 гишүүн гарын үсэг зурсан бол Ерөнхий сайдыг огцруулах бичигт Х.Баттулгын тэргүүтэй 12 гишүүн гарын үсэг зурсан байна.
Цаашлаад УИХ-ын гишүүн Н.Номтойбаярын тэргүүлсэн Үндэсний эвсэлийн дөрвөн гишүүн Ерөнхий сайд Г.Занданшатарыг огцруулах бичигт гарын үсэг зурснаа мэдэгдсэн бөгөөд шинэ Засгийн газар байгуулвал орж ажиллана гэх байр сууриа ч албан ёсоор илэрхийлсэн. УИХ дахь ХҮН намын гишүүдээс Х.Доржханд, П.Наранбаяр нар Ерөнхий сайдыг огцруулах гарын үсгийг дэмжиж байгаа бол Ж.Золжаргал, Б.Найдлаа, Б.Мөнхсоёл нар УИХ-ын даргыг огцруулах бичигт гарын үсэг зурсан. Харин УИХ-ын гишүүн Б.Мөнхсоёл өчигдөр цахим хаягаараа дамжуулж “УИХ-ын даргад ёс зүйн хариуцлага тооцох шаардлагад би нэгдэж гарын үсэг зурсан. Гэтэл УИХ-ын даргыг огцруулах бичиг болон өөрчлөгдөж гарын үсэг зуруулах процесс эхэлж буй юм байна. Миний хувьд үүнд нэгдэхгүй. Учир нь шүүхээр эцэслэн шийдэгдээгүй байхад хэнийг ч хэлмэгдүүлж болохгүй” хэмээн мэдэгдээд байгаа.
УИХ дахь ИЗНН-ынхны хувьд намын дарга Б.Батбаатар, УИХ-ын гишүүн М.Нара-Нарантуяа нар УИХ-ын дарга Д.Амарбаясгалангийн талд байгаа бол УИХ-ын гишүүн С.Замира, РБатболд нарыг Ерөнхий сайд Г.Занданшатартай нэгдсэн гэх мэдээлэл бий. Ингэснээр Төрийн ордныхон энэ тэнцүү хоёр хуваагдчихсан эх адаггүй “зодолдож” байна. УИХ-ын дарга, Ерөнхий сайд хоёрын улс төрийн энэ хагарал удах тусам Монголын төр улам бүр тогтворгүй болж, нийгэм, эдийн засаг ч хүндрэх эрсдэлтэй байна.
УИХ-ын дарга Д.Амарбаясгаланг МАН-ын даргаар бүргүүлэх өргөдлийг 60 хоногийн дотор Улсын дээд шүүхэд хүргүүлж, харин Улсын дээд шүүх 30 хоногийн дотор шийдэж батламжлах хуультай. Өөрөөр бол, УИХ-ын дарга Д.Амарбаясгаланд Ардын намын дарга болж, арслантай тамгаа албан ёсоор гардах хугацаа ойртох тусам Ерөнхий сайд хариу нүүдэл хийж эхэлсэн.
Тиймдээ ч Ерөнхий сайд Г.Занданшатар тахимаа өгөхгүйгээ илэрхийлэн, нүүрсний хулгайн хэрэг хэмээх “Б” төлөвлөгөөндөө шилжчихлээ. Ингэхдээ тэрбээр Эрдэнэс Тавантолгойн ХК-ийн оффтейк гэрээнүүдийг ил олгож задалсан.
Харин УИХ-ын дарга Д.Амарбаясгалангийн хувьд хууль хяналтын байгууллагууд дахь асуудал нь хүндрэхээс өмнө хугацаа хожихын тулд нэн даруй хариу нүүдэл хийх шаардлагатай болж байна гэсэн үг.
Тэгэхээр тахимаа өгөхгүй, танхимын сайдуудтайгаа хүч хавсрах нь тодорхой болсон Г.Занданшатарыг засагтай нь огцруулах замаар хугацаа хожих хариу нүүдэл л Д.Амарбаясгаланд үлдэж буй бололтой. Тиймээс УИХ-ын чуулганыг нэн даруй хуралдуухаар яаравчилж эхэлсэн. Тиймээс Төрийн гурван өндөрлөгийн нүүр тулах өдөр тун ойрхон байна.
