УИХ-ын гишүүн Н.Алтанхуяг “Б.Жавхлан сайд аа, чиний үед Монголын гадаад өр зээл дампуурлаа. Монголын санхүү ч дампуурлаа” хэмээн чуулганы индэр дээрээс хэлсэнтэй хэн ч санал нийлнэ. Эдийн засаг, санхүү мэдэхгүй парламентын танхимд санхүүгийн аргаар эвлүүлсэн тоо яриад зүтгэчихээр цаадуул нь ойлгох ч үгүй, аливаа асуудлыг нь чимээгүйхэн дэмжинэ. Тоо ойлгох тоотой хэдэн гишүүд, сайд нар нь тойрогтоо, яамандаа ахиухан төсөв суулгуулчих гээд мэдсээр байж чимээгүйхэн толгой дохино. Ард түмэнд статистикийн хөөстэй тоо Засгийн газраар дамжуулан хүргэчихнэ. Ихэс дээдсийн хүслийг тооны аргаар биелүүлчихнэ. Ингэхээр хоёр Засгийн газрын нүүр үзэн, Монголын мөнгөний авдарны түлхүүрийг атгалгүй яахав. Б.Жавхлан өөрөө банк, санхүүгийн унаган мэргэжил, бүр мэргэшилтэй хүн учраас буруу гарын схем дээр гаргууд сайн тоглогч бололтой юм. Тиймдээ ч төрийн болон төрлийн ажлыг тэн тэнцүүлэн авч яваа нэгэн.
ЖДҮ-г ч тойроогүй дайраад гарсан шинэхэн гишүүн байв
УИХ-д шинэхэн гишүүн Төрийн босгоор давсан даруйд найздаа Жижиг дунд үйлдвэрийг хөгжүүлэх сангаас зээл аваад өгчихсөн. Шинэ гишүүд юун Жижиг дунд үйлдвэрийг хөгжүүлэх сангаас зээл авах, ордон дотор өрөөгөө олохгүй төөрч явахад тэр аль эрт Төрийн ордонд санхүүгийн өрөг дээр нүүдэл хийж, санхүүгийн акулуудыг хожиж эхэлсэн. Ийн нүүдэл хийх зуураа бие халаалт болгож, “Пример инвестмент групп”-д 900 сая, “Жетте майнинг” компанид 800 сая, “Алтан олом” компанид 250 сая төгрөг аваад өгчихсөн. Гэхдээ би зээл авч өгөөгүй хэмээн мэлздэг ч яах аргагүй түүний танил тал, хамаарал бүхий хүмүүсийн компани байдгийг баримтаар дэлгэсэн. Ингэж л УИХ-ын гишүүний байр сууриас давуу эрхээ эрт эдэлж эхэлсэн нөхөр. За тэр, Ерөнхий сайд асан Л.Оюун-Эрдэнийн мөрөөдлийн төсөл дээр тавьсан тоог хэд ч байсан нүүдэл хийж байгаад “болно” гэдэг сайд. Үнэн хэрэгтээ Монгол Улсын эдийн засагт багтахгүй том тоо хэдий ч тэр хөөстэй тоог нь хүлээн зөвшөөрсөөр ирсэн тоглогч. Тиймдээ ч Л.Оюун-Эрдэнийн Засгийн газраас танилцуулсан төсөл хөтөлбөрөөс нэг нь ч урагшлаагүй. Ийм учраас л “Чиний үед Монголын санхүү дампуурлаа” гэж хэлээд байгаа хэрэг.
Б.Жавхлан эрх мэдэлд очсноор “Чингис хаан” банк мандан бадрав
Б.Жавхлан сайдыг яах аргагүй “Чингис хаан” банктай холбодог. Үүнийг Хууль тогтоох дээд байгууллагын хариуцлага бүхий төлөөлөл Ц.Даваасүрэн нар олонтаа дурдаж байсан бөгөөд хэвлэлүүд ч байн байн онцолдог. Учир нь түүний эхнэр А.Соёлмаа “Чингис хаан” банкны Ерөнхий захирал Б.Батхүүтэй “Ньюгоби гэйт” компанийг хамтарч эзэмшдэг бизнесийн түншүүд учраас яах аргагүй холбогдоно. Иймээс “Чингис хаан” банкинд даатгалын мөнгөнөөс эхлээд олон зүйлийг байршуулж мөнгө угаадаг хэмээн дэлгэж ч байсан. “Чингис хаан” банкинд эрүүл мэнд, нийгмийн даатгалын 130 тэрбум төгрөг, Хөгжлийн банкны 37.4 тэрбум, Хөгжлийн банкны дамжуулсан зээлийн үлдэгдэл 1.1 тэрбум, Хөгжлийн банкны охин компани “Ди Би Эм лизинг” ХХК-ны есөн тэрбум, мөн Хөгжлийн банкны охин компани “Ди Би Эм Ассет Менежмент” ХХК-аас хоёр тэрбум төгрөг гээд зөвхөн Хөгжлийн банкнаас бараг 50 тэрбум төгрөгийн зээл авсан байдаг. Эндээс яах аргагүй давуу эрх болон хууль бус олон зүйл анзааргдана.
Б.Жавхлан сайдын эрх мэдэл “Чингис хаан” банкыг дампууралд хөтлөв
Б.Жавхлан сайд “Чингис хаан” банкинд төрийн индэр дээрээс эрх мэдлээ урвуулан ашиглаж даатгалын асар олон тэрбум төгрөг цутгасан. Тухайн үедээ мөнгөөр гулгисан ч гэж хэлж болохоор байсан банк гэнэт дампуурахдаа тулсан нь Б.Жавхлан сайдын эрх мэдэл хэтэрснийх гэхэд болно. Учир нь тэрбээр иргэний үнэмлэхний хуулбар төдий хүсэлтээр хэдэн тэрбум төгрөгийг хамаарал бүхий хүмүүстээ авч өгсөн байдаг. Тодотговол, түүний хамаарал бүхий Ц.Мөнхчулуун нь 2019 оны наймдугаар сарын 30-ны өдөр “Чингис хаан” банкинд хандаж, “ОХУ-аас дизель түлш “Монисс” ХХК-д нийлүүлэх гэрээ хийсэн. Уг гэрээний урьдчилгаа төлбөр 2019 оны есдүгээр сарын 03-ны өдөр орж ирэх бөгөөд энэ хүртэл хугацаанд ОХУ-д урьдчилгаа төлбөр болох дөрвөн тэрбум найман зуун наян сая /4.880.000.000/ төгрөгийн урьдчилгаа олгож бидэнд туслана уу” хэмээх өргөдөл хүсэлтийг гараар бичээд иргэний үнэмлэхний хуулбарын хамт илгээсний хүсэлтийг биелүүлсэн. Мөн Г.Баасанжаргал 2019 оны наймдугаар сарын 28-ны өдөр дөрвөн тэрбум нэг зуун далан сая /4.170.000.000/ төгрөгийг “Чингис хаан” банкнаас дансаар бус бэлнээр авсан байх магадлал бүхий хүсэлт байдаг. Ингэхдээ “Миний бие “Говь” ХХК-д самнасан ноолуур нийлүүлэхээр тохиролцсон. 2019 оны есдүгээр сарын 10-ны дотор бараагаа нийлүүлэхэд санхүүжилт шаардлагатай болсон тул 4.170.000.000 төгрөгийн урьдчилгаа олгож бидний ажилд туслалцаа үзүүлнэ үү” гэсэн хүсэлтийг мөн болгоосон. Банкнаас ихээхэн хэмжээний зээл авахад иргэний үнэмлэхний хуулбараа хүсэлтийн дор хуулбарлан харуулаад ямар нэг барьцаагүйгээр авчихаад байхаар банк дампуурал руу явахгүй яахав. Иймээс өнөөх татвар төлөгчдийн даатгалын сангийн мөнгө эрсдэлд орж байсан удаатай.
Цар тахлаас төрсөн баячуудын нэг
”Зовлон болоход лам зоолно” гэдэг дээ. Цар тахлаас төрсөн тэрбумтнууд манай төрд цөөнгүй байсан, одоо ч байгаа. Тухайн үеийн Эрүүл мэндийн сайдаас эхлээд төрийн өндөр дээд, дунд шатанд утгаа алдсан. Б.Жавхланг ч энэ үеийн баячуудын нэг гэхэд тэгтлээ хол төөрөхгүй. Ийн баяжихад нь "Улаанбаатар төмөр зам"- ын Тээвэр зохион байгуулалтын албаны орлогч даргаар ажиллаж байгаад гэрийнх нь сэйфнээс долоон тэрбум төгрөг гарч 10 жилийн ял авсан С.Батдөл нарын цөөн нөхөд мөнгийг нь өсгөж зуулчилдаг байсан гэдгийг эх сурвалжууд хэлдэг. Тодотговол, цар тахлын хүнд үед төмөр замын ачаа тээврээр хэд нугалсан зардал авч хувьдаа завшсан асуудлыг Б.Жавхлангийнх хэмээн харддаг. Яах аргагүй С.Батдөлийг Дархан өртөөнөөс өөд нь татаж Уаанбаатар төмөр замд хурган даргын алба өгүүлсэн хүн нь Б.Жавхлан сайдыг гэдэг. Мөн цар тахлын үед үүнтэй холбогдох Замын-Үүдэд ачиж буулгах тавцан бүхий төмөр замыг Б.Жавхлан нарын нөхөд хувийн хөрөнгөөр бариулсан гэх мэдээлэл тэнүүчилж байдаг. Хувийн хөрөнгөөр ч юу байхав. С.Батдөл нарт эрх мэдлээр боломж олгон, мөнгөө өсгөдөг санхүүгийн схемээс босгосон мөнгөөр л бариулсан байх. Үүнийг нягтлан дараагийн цувралаар хүргэх болно. Тухайн үеийн төсөв, зээл тусламж, эмчилгээний зардал гээд бүгд хөөстэй, ард түмэнд наалдсан зүйл байхгүй талаар, мөн Б.Жавхлан сайдын төрд тарьж үржүүлсэн ургийн модны тухай ч дараагийн цувралаар хүргэх болно.
С.Баяр
Цуврал бий.
