УИХ-ын гишүүн Л.Оюун-Эрдэнэ нарын 33 гишүүн Тавантолгой ордын Ухаахудаг хэсэгтэй холбоотой УИХ-ын Хянан шалгах түр хороо байгуулах санаачилгыг гаргасан. Энэ тухай тогтолын төслөө 2025 оны аравдугаар сарын 6-нд УИХ-д өргөн мэдүүлсэн.
Тус Хянан шалгах түр хороо нь Тавантолгойн чулуун нүүрсний бүлэг ордод хамаарах MV-011952 дугаартай “Ухаахудаг” ашигт малтмалын лиценз болон бусад лицензтэй талбайг ашиглах үйл ажиллагаа, олборлосон нүүрстэй холбогдуулж байгуулсан оффтейк гэрээнүүд Монгол Улсын хууль тогтоомжид нийцэж байгаа эсэх, холбогдох баримт бичиг, үйл ажиллагаанд хяналт шалгалт хийх юм. Тодруулбал, Түр хорооны шалгалтын хүрээ хязгаарыг “...Өмнөговь аймгийн Цогтцэций суманд байрлах Тавантолгойн бүлэг ордод хамаарах MV-011952 дугаартай “Ухаахудаг” ашигт малтмалын лиценз болон бусад лицензтэй талбайг ашиглах үйл ажиллагаа холбогдох хууль тогтоомжид нийцсэн эсэхийг шалгаж, дүгнэлт гаргах, Тавантолгойн бүлэг ордоос олборлосон нүүрстэй холбогдуулж байгуулсан оффтейк гэрээнүүд холбогдох хууль тогтоомжид нийцсэн эсэхийг хянан шалгах, Ашигт малтмалын тухай хууль, Үндэсний баялгийн сангийн тухай хуулийн хэрэгжилтийг хангах хүрээнд дээрх лицензтэй талбайнуудыг эзэмшигч хуулийн этгээдийн оруулсан хөрөнгө оруулалт, олборлосон нүүрс, үйл ажиллагаа, мөнгөн урсгалд дүн шинжилгээ хийх” гэж тусгасан байгаа юм. УИХ-ын 33 гишүүний уг Хянан шалгах түр хороо байгуулах асуудал нь УИХ-ын босго давсан хэдий ч ЭЗБХ-ны хуралдаанаар “...Ирц бүрдэхгүй байна” гээд асуудлыг хэлэлцэлгүй 14 хонож байна.
Гэсэн ч энэ хооронд нийтдээ гурван удаа дээрх шалтгаанаар хойшлуулжээ. Ухаахудагийн Түр хорооны асуудлыг анх 2025 оны аравдугаар сарын 14-нд УИХ-ын ЭЗБХ-ны хуралдаанаар хэлэлцэхээр товлосон. Тэгсэн ч тус Байнгын хорооны дарга Р.Сэддорж “...Хяналт шалгалтын тухай хуулийн 33.2-т Түр хорооны бүрэлдэхүүнийг тогтоохдоо УИХ дахь олонх, цөөнхийн төлөөллийг хувь тэнцүүлэх боловч Түр хорооны бүрэлдэхүүний гуравны нэгээс доошгүй нь цөөнхийн төлөөлөл байх, УИХ дахь нам, эвсэл бүрийн төлөөллийг оролцуулах зарчим баримтална гэж заасан.
Олонх, цөөнхөөс хувь тэнцүүлсэн байдлаар нэр ирээгүй байгаа тул хэлэлцэх асуудлыг хойшлуулах шийдвэр гаргалаа” хойшлуулсан. Үүнээс хойш хоёр удаа хойшлуулаад байна. Тиймээс “...Ухаахудагийн Түр хорооны асуудлыг УИХ дээр “бойкотлоод” хэлэлцэхгүй байгаа юу” гэж асуухад хүргэж байна. Үүнд УИХ-ын ЭЗБХ-ны дарга Р.Сэддорж л хариулж таарна.
Б.ОЧИР
Эх сурвалж: “Зууны мэдээ” сонин
