УИХ-ын гишүүн, Шадар Сайд, ХҮН намын дарга Т.Доржханд мэдээлэл хийв. Энэ үеэрээ: "ХҮНам Засгийн газраас гарахгүй. 2028 оны сонгууль хүртэл ачаа үүрнэ гэдэг итгэл үнэмшлээр Засгийн газарт орсон. Үүнийг хариуцлагатайгаар хэлье.
ХҮНам сөрөг хүчин биш. ХҮНам хэрэв сөрөг хүчин байна гэсэн бол Засгийн газарт орохгүй байх байсан. ХҮНам эрх баригч байхгүй юу.
2024 оноос хоёр намын системээс гараад олон намын систем рүү орчихсон. 126 гишүүнтэй, 5 намтай болчихсон. Эд нараас зарим нь эрх баригч болчихсон. Хүн бүр МАН-ыг эрх баригч гээд байна. Үгүй шүү дээ. ХҮНам өнөөдөр эрх баригч шүү дээ. Засгийн эрх барьж байгаа. ИЗНН эрх баригч байхгүй юу. Ардчилсан нам, Үндэсний эвсэл хоёр сөрөг хүчин. ХҮНамд итгэж байсан ч сөрөг хүчний ажлаа хийхгүй байна гэнэ. Яаж сөрөг хүчний ажил хийх юм бэ? Засгийн газарт ажил хийж байгаа, ачаа үүрээд явж байгаа улстөрийн хүчин байхгүй юу. ХҮНам алдаа гаргах юм бол шүүмжлүүлнэ. Биднийг шүүмжил л дээ. МАН л 100 жил төр барьсан, бүгд сөрөг хүчин байх ёстой гэдэг буруу ойлголтоо халах хэрэгтэй. Сөрөг хүчин нь нэг талдаа гараад, бусад намууд нь хамтарч эрх барьж байж явдаг болчихсон.
2028 оны сонгуулиар МАН олонхи болж чадахгүй шүү дээ. Ардчилсан нам бүр боломжгүй. Манай нам боломжгүй. Дахиад л хамтарна.
Өмнөх 30 жилийн ойлголтоо хажуу тийш нь тавиачээ. Бид урваагүй. " гэлээ.
М.Чой
