Т.САЙХАН

Нийслэлийн Сүхбаатар дүүргийн ерөнхий прокурор асан Э.Амарбат нарын долоон хүнд холбогдох авлигын хэргийн шүүх хурал өнөөдөр Баянзүрх, Сүхбаатар, Чингэлтэй дүүргийн Эрүүгийн хэргийн анхан шатны тойргийн шүүхэд эхэлсэн ч шүүх хурал дахин хойшилсон байна. Сүхбаатар дүүргийн ерөнхий прокурор асан Э.Амарбат Шүүх шинжилгээний үндэсний хүрээлэнгийн дэд захирал асан Ц.Гантулга, өмгөөлөгч П.Одонтунгалаг, "Баян хотгор" ХХК-ийн Б.Мандахбаяр нарыг Эрүүгийн хуулийн дараах зүйл ангиудаар буруутгажээ. Үүнд:

-22.5-1 буюу Өөртөө, эсхүл бусдад давуу байдал бий болгох зорилгоор бусдад албаны чиг үүрэг, бүрэн эрх, албан тушаалын байдалтай нь холбогдуулан мөнгө, эд зүйл өгсөн, эдийн бус баялаг, тэдгээрийг өмчлөх эрхийг шилжүүлсэн, төлбөргүй, эсхүл хөнгөлөлттэй үйлчилгээ үзүүлсэн, эсхүл эдгээрийг амласан, санал болгосон

-17.3-2.2 буюу бусдад ноцтой, эсхүл их хэмжээний хохирол учруулж үйлдсэн

-21.2-1 буюу Гэрч, хохирогч мөрдөн шалгах ажиллагааны үед, шүүхэд, эсхүл Монгол Улсын Их Хурлын хянан шалгах түр хороонд үнэн зөв мэдүүлэг өгөхөө илэрхийлж, баталгаа гаргасны дараа зориуд худал мэдүүлэг өгсөн

-22.1-2 буюу Нийтийн албан тушаалтан албан үүрэг, бүрэн эрх, албан тушаалын байдлаа урвуулан ашиглаж их хэмжээний хохирол учруулсан

-22.4-2 буюу Энэ гэмт хэргийг хясан боогдуулах аргаар үйлдсэн, эсхүл их хэмжээний хахууль авсан бол

-10.4-1 Эд хөрөнгө, албан тушаал, гэр бүлийн хамаарал бүхий харилцаа, бусад нөхцөл байдлын улмаас эрхшээлдээ байгаа хүнийг байнга хүчирхийлсэн, доромжилсон, зодсон, тамлан зовоосон, айлган сүрдүүлсний улмаас амиа хорлоход гарцаагүй хүргэсэн

-21.14-2 буюу Прокурор, эсхүл өмгөөлөгч хэрэг шалган шийдвэрлэх ажиллагааны явцад өөртөө, бусдад давуу байдал бий болгох зорилгоор мэргэжлийн үйл ажиллагаагаа хууль бусаар явуулсан зэрэг үйлдлээр буруутган шүүж байна.

Шүүгдэгчийн өмгөөлөгч болон хохирогчийн хууль ёсны төлөөлөгч, өмгөөлөгч шүүх хуралдаан давхцсан үндэслэлээр хойшилжээ.

Эх сурвалж: www.polit.mn