ОХУ-ын Гадаад хэргийн яамны хэвлэлийн төлөөлөгч Мария Захарова Киевийн эрх баригчид террорист шинжтэй үйлдлүүдийнхээ улмаас хариу арга хэмжээнд өртөнө гэж мэдэгдлээ.

Тэрээр “Россия-1” телевизэд өгсөн ярилцлагадаа Украины эрх баригчдыг хурцаар шүүмжилж, “нацист үзэлд суурилсан, хэрцгий террорист дэглэм” хэмээн тодорхойлсон бөгөөд ийм үйлдлүүдийг хариу арга хэмжээ авахгүйгээр орхихгүй гэдгийг онцолсон байна.

Захаровагийн хэлснээр, Украины Ерөнхийлөгч Владимир Зеленский уг халдлагыг үгүйсгэж, Оросын талын мэдэгдлийг худал мэдээлэл хэмээн тайлбарлаж байгаа нь түүний үйлдлээ зөвтгөсөөр байгааг харуулж байна. Тэрбээр мөн Зеленский ийм байр сууриа хадгалснаар өөрийг нь дэмжиж, санхүүжүүлж буй талуудад бодлогоо өөрчлөхгүй гэсэн дохио илгээж байна гэж мэдэгджээ.

Түүнчлэн Захарова өмнө нь Украин хэлэлцээг удаа дараа тасалдуулж байсан хэмээгээд, Киевийн эрх баригчид энхийн зохицуулалтад сонирхолгүй, харин зэвсэгт мөргөлдөөнийг үргэлжлүүлэх сонирхолтой байгаа гэж үзэж байгаагаа илэрхийлсэн байна.

Энэ асуудалтай холбогдуулан ОХУ-ын Гадаад хэргийн сайд Сергей Лавров даваа гарагт мэдээлэхдээ, 12 дугаар сарын 28-наас 29-нд шилжих шөнө Украин Новгород мужид байрлах ОХУ-ын Ерөнхийлөгч Владимир Путины төрийн ордонд нисгэгчгүй нисэх төхөөрөмжүүд ашиглан халдлага үйлдсэн гэсэн юм. Түүний мэдээлснээр, нийт 91 дроныг агаарын довтолгооноос хамгаалах систем устгасан бөгөөд хүний амь нас хохироогүй, эд хөрөнгийн хохирол учраагүй байна.

Лавровын онцолсноор, уг халдлага нь Украины асуудлыг зохицуулах талаар эрчимтэй хэлэлцээ үргэлжилж байх үед хийгдсэн бөгөөд энэ нь нөхцөл байдлыг хурцатгаж болзошгүйг анхааруулжээ.

Н.Отгончимэг

Эх сурвалж: tass.com