Канад улс Хятадтай худалдааны хэлэлцээр байгуулсан тохиолдолд Канадын бараанд нэмэлт гаалийн татвар ногдуулна гэж АНУ-ын Ерөнхийлөгч Д.Трамп сүрдүүлсний хариуд Канадын Ерөнхий сайд Марк Карни ням гарагт мэдэгдэл хийжээ.
Тэрбээр хэлэхдээ, Канадын тал Хятадтай чөлөөт худалдааны гэрээ байгуулахаар төлөвлөөгүй бөгөөд ийм гэрээ байгуулах нь АНУ, Мексик, Канадын хооронд байгуулсан Хойд Америкийн чөлөөт худалдааны хэлэлцээрийн /USMCA/ зарчимд харшилна гэдгийг дурдлаа.
Түүний мэдэгдсэнээр, Хятадын талтай хийсэн тохиролцоо нь сүүлийн жилүүдэд Канад-Хятадын худалдаанд үүсээд байсан цахилгаан автомашин, хөдөө аж ахуйн бүтээгдэхүүн, загасан бүтээгдэхүүнтэй холбоотой зарим асуудлыг хөндсөн ажээ. USMCA гэрээний дагуу хүлээсэн үүргээ Канад улс хүндэтгэн сахиж биелүүлнэ гэдгийг тэрбээр мөн онцлон тэмдэглэлээ. Саяхан Д.Трамп хэлэхдээ, хэрвээ Канад улс Хятадтай худалдааны хэлэлцээр байгуулбал тус улсын бараанд 100 хувийн татвар ногдуулна гэж мэдэгдсэн юм.
“Хэрвээ Канад улс Америк руу чиглэсэн Хятадын барааны дамжин өнгөрөх цэг болно гэж бодож байгаа бол Карни маш эндүүрчээ, хятадууд Канадыг бүхлээр нь залгиж, түүний бизнесийн орчин, нийгмийн бүтэц, амьдралын хэв маягийг эвдэнэ” гэж АНУ-ын Ерөнхийлөгч Truth Social нийгмийн сүлжээний хуудсандаа бичсэн байна.
Нэгдүгээр сарын дундуур Канадын Ерөнхий сайд Бээжинд айлчилж Хятадын удирдагч Ши Жиньпинтэй уулзсаныхаа дараа хэлэхдээ, Хятад улстай “стратегийн шинэ түншлэл” тогтоож, хоёр орны худалдаан дахь саад бэрхшээлийг арилгах, гаалийн татварыг харилцан бууруулах талаар шинэ гэрээ байгуулсныг зарлан мэдэгдсэн юм. Ташрамд дурдахад, 2018 оны 11 дүгээр сард АНУ, Мексик, Канадын хооронд Чөлөөт худалдааны гэрээ байгуулагдсан бөгөөд өмнө нь 1994 оноос хойш үйлчилж байсан НАФТА хэлэлцээрийг АНУ-д ашиггүй хэмээн Д.Трамп үзсэн байна.
Б.Адъяахүү
