Т.БАТСАЙХАН
Зэрлэг амьтны хамгаалал, стандартын бус хашаанаас үүдэлтэй эрсдэл болон хашааны стандартын хэрэгжилтийн талаар Байгаль орчин, уур амьсгалын өөрчлөлтийн сайд Б.Батбаатар мэдээлэл өглөө.
Тэрээр “Ойн сантай ойр, зэрлэг амьтдын бэлчээр, нүүдлийн замтай давхцсан ашиглалтын талбайг зөвшөөрөлгүй ашиглах, нийтийн эзэмшлийн зам талбай, орц гарцыг хаасан хууль бус үйл ажиллагаа цөөнгүй илэрч байна. Үүнтэй холбогдуулан байгаль хамгаалагч, албан хаагчид долоо хоног бүрийн мягмар, лхагва, пүрэв гарагт тогтмол шалгалт хийж, стандарт бус хашаа, барилга байгууламжийг буулгах ажлыг зохион байгуулж байна.Зэрлэг амьтанд ээлтэй хашааны стандартыг хэрэгжүүлэх тухай 2025 оны арваннэгдүгээр сарын 10-ны өдөр гарсан албан даалгаврын хүрээнд Богдхан уулын дархан цаазат газрын 27 байршилд нийт 43 иргэн, аж ахуйн нэгжийн 10 мянга 753 метр буюу 10.7 км урт стандарт бус хашааг буулгаж, стандартад нийцүүлсэн. Гэсэн ч зарим иргэн, аж ахуйн нэгж хашааны стандартыг мөрдөөгүй хэвээр байна. Үүний улмаас 2026 оны нэгдүгээр сарын 30-ны өдөр Хан-Уул дүүргийн 23-р хороо, Богдхан уулын дархан цаазат газрын Нүхтийн амны хязгаарлалтын бүсэд байрлах Эс Жи Жи Эс компанийн барьсан стандарт бус хашаанд халиун буга гэмтсэн тухай дуудлага мэдээлэл ирсэн. Халиун бугын нэг бодгалийн экологийн болон эдийн засгийн суурь үнэлгээ нь 12 сая 700 мянган төгрөг. Тусгай хамгаалалттай газар нутагт уг үнэлгээг хоёр дахин нэмэгдүүлдэг тул 25 сая 400 мянган төгрөгийн торгуулийг оногдуулсан. Үүнээс гадна захиргааны хэм хэмжээ, акт, дэглэм зөрчсөн үндэслэлээр 30 сая төгрөгийн торгуулийг нэмж ногдуулсан. Ингэснээр Эс Жи Жи Эс компанид холбогдох бүх торгуулийг хуулийн дагуу оногдуулсан. Мөн тухайн компанийн газар ашиглалтын талбайг хэсэгчлэн цуцалж, хэмжээг нь 18 мянга 149 м.кв болгон багасгах асуудлыг шийдвэрлэхээр хамгаалалтын захиргаанаас 2026 оны нэгдүгээр сарын 30-ны өдөр А/85 тоот албан бичгээр сонсох ажиллагааны мэдэгдэл хүргүүлсэн бөгөөд газрын эрхийг өнөөдөр цуцалж байна гэлээ. Мөн тэрээр “Богдхан уулын дархан цаазат газрыг Улаанбаатар хотын харьяанд шилжүүлэх боломжгүй гэдгийг Байгаль орчин, уур амьсгалын өөрчлөлтийн сайдын хувьд тодорхой илэрхийлж байна. Одоогоор Богдхан уулын дархан цаазат газарт нийт 114 мянган иргэн ажиллаж байгаа бөгөөд эдгээр хүмүүсийн эрх ашгийн асуудал ч мөн яригдана. Иймээс бид Тусгай хамгаалалттай газар нутгийн тухай хуулийн шинэчилсэн төслийг боловсруулж байгаа бөгөөд энэ хаврын УИХ-ын чуулганаар өргөн барина. Хуулийн зохицуулалт тодорхой болсноор олон жил хуримтлагдсан асуудлууд нэг мөр шийдэгдэх юм.
Стандарт бус хашааг буулгуулах шаардлага зөвхөн Богдхан уулд хамаарахгүй, бүх тусгай хамгаалалттай газар нутагт адилхан үйлчилнэ. Албан шаардлагыг биелүүлээгүй тохиолдолд тухайн газрын ашиглах зөвшөөрлийг цуцлах арга хэмжээ авна. Бид 30 хоногийн хугацаа олгож, энэ хугацаанд хашаагаа буулгаагүй газруудын эрхийг цуцлах шийдвэр гаргана. Харин зарим газрууд хашаагаа буулгаж эхэлсэн тухай мэдээлэл ирээд байгаа юм” гэлээ.
Эх сурвалж: “Зууны мэдээ” сонин
2026 ОНЫ ХОЁРДУГААР САРЫН 4. ЛХАГВА ГАРАГ. № 23 (7765)
