Монголын улс төрд эргэж ирдэг улстөрчид бий. Тэд нам гүм болдог ч бүр мөсөн алга болдоггүй. Харин тохироо бүрдвэл дахин гарч ирдэг. Тэдний нэг бол С.Баярцогт.
Сүүлийн үед түүнийг том албан тушаалд өрсөлдөх гэж байна гэх яриа улс төрийн хүрээнд яригдаж эхэллээ. Бүр тодруулбал, АН-ын Ерөнхий нарийн бичгийн дарга болох уу, эсвэл 2027 оны Ерөнхийлөгчийн сонгуульд нэр дэвших үү гэж байна.
АН-ын дарга О.Цогтгэрэл тамга тэмдгээ гардаж, албан ёсоор намаа аваад өөрийн стратеги төлөвлөгөөг хэрэгжүүлж эхэлсэн. Тэгвэл С.Баярцогт намын даргынхаа төлөвлөгөөнд ямар байдалтай багтсан юм бол гэдэг нь анхаарал татаж байна. Намын генсек гэдэг бол ил гарч индэр дээр попрох албан тушаал биш. Харин намын бүтэц, санхүү, сонгуулийн штаб, дотоод фракцын тэнцвэрийг атгаж байдаг жинхэнэ “гал тогоо” баригч гэсэн үг. Хэрэв С.Баярцогт энэ албан тушаалд очвол харьцангуй туршлагатайд тооцогдоно. Мөн олон улс талдаа ч харилцаа холбоо сайтай улстөрч. АН энэ талаас нь ашиглаж мэдэх юм.
Гэхдээ нөгөө талдаа түүний нэр хүндтэй холбоотой маргаанууд, олон нийтийн итгэлийн асуудал дахин сөхөгдөж, АН-ын олон фракц улам холдох эрсдэлтэй сонголт байж мэднэ. Харин С.Баярцогт 2027 оны Ерөнхийлөгчийн сонгуульд нэр дэвших сонголтыг хийх үү.
Одоогоор АН-аас намын дарга асан Л.Гантөмөр нэр дэвших бодолтой байгаагаа илэрхийлээд байна. Мөн зарим судалгаагаар Ерөнхий сайд асан Н.Алтанхуяг нэр дэвших боломжтой гэж гарсан харагдана лээ. Тэгэхээр дараагийн боломжит хувилбар нь С.Баярцогт байж мэдэх юм. Ерөнхийлөгчийн сонгууль бол намын аппаратын тоглоом биш, ард түмний саналын өрсөлдөөн байдаг. Нам дотроо хүчтэй байх нь хангалтгүй гэсэн үг.
Өнөөдөр эрх баригчид нам төдийгүй сөрөг хүчин ч нэг том сорилттой тулгарч байна. Шинэ үеийн, цэвэр имижтэй улстөрчдийг гаргах уу. Эсвэл хямралын үед туршлагатай “хуучин тоглогч”-доо найдах уу. С.Баярцогтын тухай яриа гарч ирж байгаа нь нэг зүйлийг батална.
Монголын улс төр шинэ хүмүүсээр дүүрээгүй байна. Тиймээс хуучин хүмүүс эргэж яригдсаар. С.Баярцогт Ерөнхийлөгчид нэр дэвших үү, Ерөнхий нарийн бичгийн дарга болох уу гэдэг нь хувь хүний шийдвэрээс илүү намын стратегийн шийдвэр байх биз ээ.
Т.САЙХАН
Эх сурвалж: “Зууны мэдээ” сонин
