Сүүлийн хоёр долоо хоногийн турш монголчуудаар улс төр оролдож, улс төр өөрөө сандал суудлын зодоонтой байлаа. Шинэ Ерөнхий сайд, шинэ Засгийн газар байгуулагдсан одоо ажилдаа анхаарч, гадаад дотоод хүчин зүйлээс шалтгаалж буй үнийн өсөлт, ард иргэдийнхээ амьдрал анхаарч, ажлаа хийх цаг ирлээ.
Нэг долоо хоногийн дотор УИХ-ын дарга, Ерөнхий сайд хоёроо унагаж, шинэ Ерөнхий сайдаа томилсон ч Засгийн газраа бүрдүүлж чадахгүй байсаар Баасан гаригийн шөнө дөлөөр шинэ сайд нар тамгаа гардаж авав. Энэ Засгийн газрын сайд нарын олонх нь хуучин сайд. Ялангуяа эдийн засаг, гадаад харилцаа зэрэг чухал салбаруудын сайд үлдсэн бол Сангийн сайд нь шинээр томилогдсон. Нэгэнт засгийн газар шинээр байгуулагдсан шинэ сангйин сайдтай учраас өнөөгийн нөхцөлд төсөвт тодотгол хийх, үр ашиггүй төсвийн зарцуулалтаа эргэн харах гээд чухал үүрэг ирж байна. Нөгөө талд сайд нарт одоо "гоншигнох" цаг байхгүй.
Ерөнхий сайд Н.Учрал, Засгийн газрын сайд нар ч өнөөдрийн нөхцөл байдлыг мэдэхийн дээдээр мэдэрч, харж албан тушаалдаа үлдэж, очсон.
Тиймээс энэ нь ч болохгүй байна, тийм зүйл ч болохгүй байна гэж шалтаг тоочиж, цаг алдаж, өмнөх сайддаа, Засгийн газраа буруутгах, эсвэл гадаад хүчин зүйлээс шалтгаалж байна гэж "гоншигнох" эрх энэ Засгийн газарт байхгүй, байх ч ёсгүй. Ард түмэн сандал, суудлын төлөө, эрх мэдлийн төлөө хэрхэн "тэмцэлдэж", нэгнийгээ намнаж, шуналтдагийг тань хангалттай харлаа, ардын намынхаан.
Дэлхийн геополитикийн нөхцөл байдлаас шалтгаалж шатахуун, дизель түлшний үнэ нэмэгдэж эхэлсэн. Цаашид ч нэмэгдэх учраас үнэ нэмэх сургаар өргөн хэрэглээний барааны үнэ нэмэгдээд эхэлсэн. Нийслэлчүүд махаа 35 мянган төгрөгөөр авч, нөөцийн махан дээр очерлох дээрээ тулсан. Өргөн хэрэглээний бараа бүтээгдэхүүний үнэ нэмэгдэнэ гэдэг өөрөө ард иргэдийн халаас нимгэрнэ, цаашлаад төгрөгийн ханш суларна, орлого буурна. Ийм л бодит нөхцөл шинэ Засгийн газрыг хүлээж байна. Эдийн засгийн эрсдлийг даван туулахын тулд бодит нөхцөл байдлуудаа бодитоор үнэлэх, төсөв тодотгох, аж ахуй нэгжүүдэд чиглэсэн арга хэмжээ авахаас Засгийн газрын ажид эхлэх нь.
