Өдрөөр тооцох нь ээ бүтэн жил хүрэхгүйн дараа Ерөнхийлөгчийн сонгууль болно. Урьдын жишээгээр бол өдий гэхэд Ерөнхийлөгчид нэр дэвшигчид язганаж байдаг цаг. Гэтэл таг. УИХ 24 оноос таван намтай болсон. Урьд нь УИХ үндсэндээ хоёр намтай, тэр хоёр нь жил гаруйн өмнөөс Ерөнхийлөгчид дэвшигчээ сойгоод, эдүгээ ид пиардаад эхэлсэн байдаг байв. Гэсэн ч нам таг. Тэрүүгээрээ 27 оны Ерөнхийлөгчийн сонгууль ихээхэн хачин болохоор шиг.
Уул нь 26 он гараад зарим нам нь эрч хүчтэй дуугарч эхэлсэн. ИЗНН-ын дарга Б.Батбаатар: Би дэвшинэ гэсэн. АН-ын Н.Алтанхуяг: Нэр дэвшинэ гэлээ. АН-аас С.Ганбаатар ч тэрэрхүү байр суурь хэлсэн. Хэдэн өдрийн өмнө 2 том намын байр суурь их хачин болоод ирлээ. МАН-ын генсек Я.Содбаатар: Ард нийтийн хүссэн Ерөнхийлөгчийг Ардын нам тодруулж дэвшүүлнэ гэв. Я.Содбаатарын хэлснийг тамхины цэг хавиар: Ард нийтийн санал асуулга явуулах л гэж төлөвлөж байгаа, тэрүүгээр ард нийтийн хүссэн Ерөнхийлөгч гээд МАН-ын хүсэмжит Ерөнхийлөгчийн нэр гарч ирнэ гэх. Энэний учир жанцанг арай л гүйцэд ухдаггүй. Удаж төдөхгүй ойлгогдох байх гэж найдна. АН-ын дарга болохоор 27 оны Ерөнхийлөгчийн сонгуулийг алгасаад 28 оны УИХ-ын сонгуульд нэр дэвшигчдийн сунгаа зарлаж байгаагаа зарлалаа. Энэнээс өөр юм байхгүй. Яагаад юм бол? Учир жанцанг нь ухаж ойлгож байгаа хүн алга.
Гэх нь ээ: Г.Занданшатар л өөрийгөө сойж, тарлаад яваад байна. Тэрээр: Би Ерөнхийлөгчид үзнэ гэхгүй байгаа ч нэр дэвших гээд хамаг байдгаараа зүтгэж буй тухай яриа тамхины цэгээр тараад удсан.
Г.Занданшатар УИХ-ын дарга байхдаа УИХ-д нэр дэвшээд ойчсон. Ойчоод нэр нь унасан. ЕТГ-ын дарга болсон. Тэр дээрээсээ Ерөнхий сайд болсон. Ерөнхий сайдын албан тушаал өөрөө нэр өсгөдөг, басхүү муутгадаг. Гоц гойд ажиллаагүй ч хувь нэр хүнд нь хамаагүй өөрчлөгдсөн. Тэгж яваад унасан. Унаснаасаа хойш бол Г.Занданшатарын нэр хүнд байнгын өсөлттэй байгаа. Өөрөө ч Ерөнхийлөгчийн сонгууль харчихсан, тасралтгүй ажиллаж байна. Тэр нь нөлөөлж байгаа байх.
Сүүл үеийн судалгааны байгууллагуудын дүнгээр өнөөдөрдөө МАН-ынхны Ерөнхийлөгчид үзчихээр 50+ насныхан дунд Г.Занданшатарын урд гишгэх хүн гарахгүй нь.
Уул нь: Г.Занданшатар Ерөнхий сайдаас унаад багагүй удсан. Найман сар болж байгаа. Гэсэн хэр нь: МДА судалгааны байгууллагын гаргасан 26 оны 6 сарын сошиалд сүлжээний хандалтын сентиментийн бодит дэмжлэгээрээ цээжний хэдэн улстөрч дунд давхиж явна. Түүнийг: 30.4 хувийн дэмжлэгтэй гэж. Г.Занданшатарын дээр байгаа хэдийг дэмжлэгийн хувиар нь эгнүүлбэл, УИХ-ын гишүүн Ж.Баярмаа, УИХ-ын гишүүн Ч.Лодойсамбуу, Эрүүл мэндийн сайд Э.Батшугар, УИХ-ын гишүүн С.Цэнгүүн, Шадар сайд Н.Номтойбаяр, Ерөнхий сайд Н.Учрал, Нийслэлийн Засаг дарга Б.Пүрэвдагва, УИХ-ын гишүүн П.Сайнзориг, УИХ-ын дарга С.Бямбацогт, УИХ-ын гишүүн Б.Жаргалан, УИХ-ын гишүүн О.Цогтгэрэл, Аж үйлдвэр, эрдэс баялгийн сайд Г.Дамдинням нар байна. Г.Занданшатарын ард: ЗГХЭГ-ын дарга Б.Энхбаяр, Тэргүүн Шадар сайд Ж.Энхбаяр, Ерөнхийлөгч У.Хүрэлсүх нар орж. Түүний дээр байгаа хэдээс 27 онд өрсөлдөж болох нь С.Бямбацогт. Гэлээ гэхдээ Г.Занданшатар ажилгүй, С.Бямбацогт УИХ-ын дарга. Тэр хоёрын зөрүү нь 14 орчим хувь. МДА энэхүү судалгааг Улаанбаатар, Дархан, Эрдэнэтийн иргэдээс авч.
Басхүү МЭК-ийн 26 оны 6 сарын өндөр дэмжлэгтэй улстөрчдийн судалгааны дүн гарч. Тэрүүгээр Ерөнхийлөгч У.Хүрэлсүх нэгдүгээрт, УИХ-ын гишүүн, АН-ын дарга О.Цогтгэрэл хоёрдугаарт, Ерөнхий сайд асан Г.Занданшатар гуравдугаарт орж. Ардаас нь: Ерөнхий сайд Н.Учрал, УИХ-ын гишүүн Ч.Лодойсамбуу, УИХ-ын гишүүн Ө.Шижир, УИХ-ын гишүүн Н.Алтанхуяг, УИХ-ын дэд дарга Б.Пүрэвдорж бичигдэж. Эд нараас харах нь ээ: Ерөнхийлөгч У.Хүрэлсүх дахиад дэвшдэггүй юм бол Г.Занданшатарын урд байгаа 50+ настнууд бас алга.
Ерөнхийлөхөд: Г.Занданшатар Ерөнхийлөгчид дэвшихэд саад бага харагдана. Гэлээ гэхдээ: МАН хэнийг дэмжих вэ гэдэг сонин. МАН-ын генсекийн хэлсэн: Ард нийтийн хүссэн Ерөнхийлөгч нь тэр мөн үү. Гээд асуудал их.
Г.Занданшатар бол өөрөө Ерөнхийлөгчид асар идэвхтэй, хүчтэй зүтгэж байгааг дээр ч, өмнө ч олон хэлсэн. Түүний эхний бариа нь намынхаа дэмжлэгийг авч: Ард нийтийн хүссэн нэр дэвшигч болох. Эмэгтэйчүүдээс хүчтэй орж ирэх байсан Б.Батцэцэг: Би дэвшихгүй гэсэн. С.Бямбацогт бол УИХ-ын дарга дээрээ удах хүсэлтэй. Гэхдээ: Н.Учрал унавал дагаад С.Бямбацогтын албан тушаалд хөдөлгөөн орно. Гэлээ ч тэр хүртэл хэд хоног ч бай, УИХ-ын даргын суудал дээр байх нь түүний зорилго. Басхүү Ж.Энхбаяр байна. Ж.Энхбаярын сүүл үед Н.Учралын өмнөөс галтай сэдвүүд дээр нь орж шатаад байгаа. Алтны төслөөс эхлээд. Хэрэвзээ Ерөнхийлөгчид явах байсан бол засгийн хамаг галыг өөртөө авахгүй л байсан байх. Гол өрсөлдөгч Б.Жавхлан үлдэж байгаа. Б.Жавхлан дээр яг шийдвэр гараад, нэр дэвшиж байгаагаа зарлаад явбал маш эвгүй. Эдүгээ судалгаанд сураг чимээ үгүй ч тэгсэн нөхцөлд дээшээ гараад ирнэ. Тийм байдаг. Тиймийн учраас МАН 27 онд Ерөнхийлөгчид нэр дэвшигчээ тодруулахаас өмнө Б.Жавхлан Ерөнхий сайд болж байж Г.Занданшатарын зам мөр тэгширнэ. Улаанбаатарын урдах уулын амыг эзлэнхэн төрсөн улстөрч найзынх нь ахалдаг команд хэр зэрэг сайн ажилласан нь Б.Жавхлангийн томилгооноос харагдах ёстой. Тэрнийг хүртэл тэрээр гадаад дотоодод шатар, хиймэл оюун ухаан, эдийн засгийн арга хэмжээ, найр наадам гээд юу ч үлдээхгүй морилон очиж өөрийгөө үзүүлэнгээ афоризм хэлсэн шиг. Тэгж явах нь ч зүй. Өөрөөр: таван нам таг, тарлаад байгаа нь ганц Г.Занданшатар байна. Ийнхүү богино зайд тар хийж явтал нь сонгууль хэмээх баяр наадам албан ёсоор эхэлнэ. Уулаасаа: Сонгууль гэдэг наадам байдаг хойно…
Ө.БАТБИЛЭГ Өдрийн сонин
