Владимир Путин 2024 он хүртэл Кремлийн эзэн хэвээр үлдэх магадлалтай


Оросуудын олонх нь Владимир Путинийг Ерөнхийлөгчөөр улиран сонгогдохыг дэмжлээ. Тус улсын санал асуулгын төвөөс явуулсан асуулгаар сонгогчдын 83.3 хувь нь Владимир Путинд санал өгөхөө илэрхийлсэн байна. ОХУ- ын Ерөнхийлөгчийн сонгууль ирэх оны гуравдугаар сарын 18-нд болохоор товлоод байна. Тус улсын одоогийн Ерөнхийлөгч Владимир Путин энэ сонгуульд бие даан нэр дэвшихээ зарласан. Тэрбээр ялалт байгуулсан тохиолдолд ОХУ-ын эдийн засаг, дэд бүтэц, эрүүл мэндийн салбарт иж бүрэн шинэчлэл хийнэ гэдгээ илэрхийлээд байгаа. Хэрэв Путин дахин сонгогдвол 2024 он хүртэл Кремлийн эзэн хэвээр үлдэж, 29 жил Кремльд сууж, Оросын төрийн эрхийг хамгийн олон жил барьсан Йосиф Сталины дараа бичигдэх удирдагч болно. Харин түүний гол өрсөлдөгч гэгдэж буй хүн бол Либерал Ардчилсан намын тэргүүн Владимир Жириновский.

Тэрбээр урьдчилсан санал асуулгаар 4.1, Коммунист намын тэргүүн Геннадий Зюганов 3.3 хувийн санал тус тус авчээ. Владимир Путин өнгөрсөн долоо хоногийн мягмар гарагт дэмжигчидтэйгээ уулзаж, түүний шинэ мөрийн хөтөлбөрийн зорилго нь Оросын эрх чөлөө, нийгмийн тогтвортой байдлыг хангаж, дэлхийн улс орнуудын дунд тэргүүлэх байр суурь эзлэхэд оршиж байгааг танилцуулсан.Энэ сарын 18-ны өдөр ОХУ-ын Ерөнхийлөгчийн ээлжит сонгуулийн кампанит ажил албан ёсоор эхэлсэн. 2018 оны гуравдугаар сарын 18-ны өдөр болох ОХУ-ын Ерөнхийлөгчийн ээлжит сонгууль дөрвөн жилийн өмнө Крымын хойг ОХУ-д нэгдсэн өдөртэй давхцаж буй юм. Тэмдэглэлт өдөртэй давхцаж буй учир сонгуулийн ирц сайн байхыг шинжээчид онцолж байна.

Сонгуулийн кампанит ажил эхэлснээр энэ сарын 27-ноос нэгдүгээр сарын 31-нийг хүртэл буюу 20-25 хоногийн дотор намаас болон бие даан нэр дэвшигч 300 мянган дэмжигчийн гарын үсэг, парламентад суудалгүй намаас нэр дэвшигч 100 мянган дэмжигчийн гарын үсгийг бичиг баримттайгаа хавсарган Сонгуулийн төв комисст хүргүүлэх ёстой бол парламентад суудалтай намын нэр дэвшигч гарын үсэг цуглуулах шаардлагагүй ажээ.

ОХУ-ын Ерөнхийлөгчийн ээлжит сонгуульд нэр дэвшихээ одоогоор 23 хүн мэдэгдээд буй. Сэтгүүлч Ксения Собчак, Авлигатай тэмцэх сангийн тэргүүн Алексей Навальный, Либерал ардчилсан намын тэргүүн Владимир Жириновский, бизнесмэн Борис Титов, Яблоко намын тэргүүн Григорий Явлинский нар багтаж байна.

Кампанит ажил албан ёсоор эхэлснээр сонгуулийн зохион байгуулалт болон бэлтгэл ажилд зарцуулах 14.9 тэрбум рубль Сонгуулийн Төв комиссын мэдэлд шилжжээ. Зөвлөлт систем задран унасны дараа Оросын нийгэм хөл толгойгоо алдаж, иргэд ядуу тарчиг амьдарч байв. Путин 2000 онд Ерөнхийлөгчөөр сонгогдохдоо Орост хамгийн түрүүнд нийгэм эдийн засгийн тогтвортой байдлыг бий болгосон юм. Түүнийг Ерөнхийлөгч байх найман жилийн хугацаанд жирийн иргэдийн орлого нэмэгдсэн. Путинийг сонгуульд өрсөлдөхөө зарласны дараа сөрөг хүчний лидер Алексей Навальний твиттертээ “Путин энэ суудалдаа 21 жил суухыг хүсч байгаа бололтой. Миний бодлоор энэ хэтэрхий урт хугацаа. Бид үүнийг зөвшөөрөхгүй” гэж бичсэн байна. Харин Чеченийн удирдагч Рамзан Кадиров “Баруун Европын дайснуудын тааварлахын аргагүй, гэнэтийн, хайр найргүй түрэмгийллийг эсэргүүцэн зогсч чадах ганц хүн тэр” хэмээн инстаграм хуудсандаа бичжээ.

 

 

Э.Билгүүн

Эх сурвалж: "Монголын үнэн" сонин


Энэ мэдээ таалагдаж байвал:


  • зочин · [49.0.218.6] · 2018/03/22

    В.Путин мундаг удирдагч


  • Зочин · [202.179.27.33] · 2017/12/24

    В.Путингуай бол Тэнгэрээс эзэн Богд Чингэсийн 1999 оны 7сард Дэлхийг төвшитгөхөөр эх дэлхий рүү минь илгээсэн Монгол угсгааны Их ухаантан мөнөөсөө мөн шүү дээ.


  • TOR ZASAG · [66.181.180.101] · 2017/12/22

    argagui l udirdagch xun shig baigaam daa ali ch talaaraa