Ардчилсан Монгол Улсын иргэд өнөөдөр Төв талбайд өлсгөлөн зарлан, тэднийг хэн дуртай нь дэмжиж байр сууриа илэрхийлж болж байна. Хэн нэгний өөдөөс эрхээ нэхээд зоригтой дуугарч ч чадаж байна. Энэ мэтчилэн хязааргүй эрх чөлөөг авчирсан ардчилагчдын нэг Э.Бат-Үүлийг өнгөрсөн амралтын өдөр ихээхэн басамжлан доромжлов оо, монголчууд.
Улстөржилт, талцал, өдөөн турхиралт монголчуудыг сохроож гүйцжээ. Эрх чөлөөг нь олгохын төлөө 30 жилийн өмнө тэмцэж байсан хүнийхээ тэргүүнд хүрч, үс гэзгийг зулгаан өшгичин зандчиж байгаа муухай дүр зураг түүхэнд үлдэж байна.
Э.Бат-Үүл гомдсон. Гэхдээ тэр түүнийгээ нуун, "Жагсаал цуглаан бол Ардчилсан нийгэмд байдаг бахархалт зүйл" хэмээн зөөллөж сууна. Өнөөдөр хүртэл олон ардчилагчид дундаас ардчиллыг үргэлжлүүлэх ёстой, залуус ардчиллаа үргэлжлүүлэн авч явах ёстой хэмээн нэг л байран дээрээ дуугарсаар ирсэн нэгэн бол тэр. Тэр эрх мэдлийн төлөө улайраагүй, эд мөнгөний төлөө ард иргэд, албан тушаалаа худалдаагүй. Түүнийг хэдхэн жилийн өмнө Улаанбаатар хотыг хэрхэн өөрчилснийг нийслэлчүүд андахгүй.
Гэвч өнөөдөр тэр ард иргэд нь Э.Бат-Үүлийг үсдээд чирэхээс холгүйхэн болголоо. Монголчууд муухай болж байна. Улстөржилт, өдөөн турхилалтад нүдээ олохоо байж байна...
Эх сурвалж: shuurhai.mn Г.ОЧИР
