fbpx ЭНЭ БАРИЛГЫН ЖИНХЭНЭ ЭЗЭН НЬ ХЭН БЭ?
 
Энэ мэдээ хуучирсан буюу 2021/05/18-нд нийтлэгдсэн мэдээ болно.
Ангилал
Эдийн засаг
Хэзээ
2021/05/18
Унших
7 минут 49 секунд

ЭНЭ БАРИЛГЫН ЖИНХЭНЭ ЭЗЭН НЬ ХЭН БЭ?

Хогийн цэг хэдэн төгрөгийн үнэ хүрсэн бол...

Улаанбаатарын газрыг бүхэлд нь зарж, төлөвлөлтгүй болгоход үнэлж баршгүй хувь нэмэр оруулсан хүмүүс бол хотын үе, үеийн дарга нар. Тухайлбал, хэдхэн жилийн өмнө оршин суугчид нь хогийн цэг болгон ашиглаж байсан газарт өдгөө зургаан давхар оффисын барилга сүндэрлэж, олон хүний атаархлыг төрүүлж байна.

Тодруулбал, Сүхбаатар дүүргийн 6 дугаар хорооны нутаг дэвсгэр буюу Төрийн ордны чанх хойно байрлах хуучны орон сууц буюу хотын төвийн А зэрэглэлийн бүсэд хамаарагдах газарт оршин суугчдын хогийн цэгт өндөр үнэтэй барилга барьж, зориулалтаа өөрчлөн оффис болгожээ. Олны атаархлыг төрүүлж, анхааралд орсны учир нь ердөө л “Хогийн цэгээр ашиглагддаг, хэдхэн алхам газрыг хэн авч чадах вэ” гэдэгт байгаа юм. Ихээхэн бөх зүрхтэй, танил ихтэй, том артай хүн л Төрийн ордны хойно хашаа хатгана гэдгийг уншигчид андахгүй мэдэх биз.

Бид энэхүү хогийн цэгт анх барилга баригдаж эхлэх 2017 онд сурвалжилга хийж орчны оршин суугчид нь нийтийн эзэмшил талбайг нь үгүй хийж, цэцэрлэгийн зориулалттай барилга барих гэж байна хэмээн хэвлэлийнхэнд гомдол мэдүүлж байв. Мэдээж цэцэрлэг, сургуулийн хомсдолтой байдаг учраас тухайн барилгын эзэд эз дийлж, ажлаа үргэлжлүүлсээр өдгөө тэнд цэцэрлэг биш оффисын зориулалт бүхий барилга ашиглалтад орж, түрээслэгч, худалдан авагчид нь дотоод заслын ажлаа эхлүүлжээ.Энэхүү хогийн цэг байсан газрыг хэн гэгч хүн авсан бэ гэдгийг судлаад үзтэл нэг нь иргэн, нөгөө нь “ДМК ЗГБХН” гэсэн компанийн нэр дээр 2017 оны 5 дугаар сарын 02-ны өдөр 000321467 дугаар бүхий тооттой газар эзэмших гэрчилгээ гарсан байв.

Тодруулбал, Баяр овогтой Эрдэнэболд дээрх газрыг 2017 оны 07 сарын 06-ны өдрийн А/352 тоот захирамжаар 590 м2 газрыг 15 жилийн хугацаатайгаар үйлчилгээний зориулалттайгаар авсан бол “ДМК ЗГБХН” ААН байгууллага 2017 оны 5 дугаар сарын 02-ны өдрийн А/267 тоот захирамжаар 360 м2 газрыг 15 жилийн хугацаатай бас л үйлчилгээний зориулалтаар эзэмших эрхийг нь авчээ.

Гэтэл дээрх нэр бүхий иргэн болон ААН хотын А зэрэглэлийн газарт үйлчилгээний зориулалтаар газар авсан хэрнээ яагаад ийнхүү зориулалтыг нь дур мэдэн өөрчилж ОФФИСЫН барилга болгон хувиргав.

Тиймээс бид энэ тухай Хот байгуулалт, Хөгжлийн газрын хэвлэлийн албан мэргэжилтэн Б.Амарсанаагаас тодруулахад “Бид газрын албанаас олгосон зориулалтын дагуу барилгын зөвшөөрлийг олгодог. Та бүхний асууж буй байршилд иргэн болон ААН-д 2017 онд Нийслэлийн Засаг даргын захирамжаар үйлчилгээний зориулалттай газар олгосон байсан. Үүнийг нь үндэслэн дээрх хүмүүс манайд барилга барих хүсэлт ирүүлсний дагуу 2019 онд Мэргэжлийн зөвлөлийн хурлаар хэлэлцэж үйлчилгээний зориулалттай барилга барих зөвшөөрөл олгосон. Манай баталсан эх зураг бол үйлчилгээний зориулалттай. Үүнийг хүлээж авах газар нь Улсын комисс. Хэрвээ загвар зургийг өөрчилсөн бол Улсын комисс хүлээж авахгүй. Учир нь манай баталсан зургийн дагуу Улсын онцгой комисс хүлээж авна гэсэн үг. Өөрөөр хэлбэл, 2020 онд батлагдсан загвар зураг нь үйлчилгээний зориулалтаар батлагдсан” гэв.

Товчхондоо барилгын зориулалт, зургийг өөрчилсөн бол Улсын комисс хүлээж авахгүй гэдгийг албаны хүн онцлон хэлж байв. Ингээд бид Хангарьд ордны 9 давхарт байрлах Мэргэжлийн зөвлөлийнхнөөс дээрх барилгын зориулалт өөрчлөгдсөн эсэх, мөн Улсын комисс хүлээж авсан эсэх талаар асууж тодруулах гэсэн боловч мэдээлэл өгөх албан тушаалтан олдоогүй юм. Үүний дараа бид тус оффис дээр очиж үйлчилгээний зориулалттай эсэхийг нь үүдний жижүүрээс нь асуухад “Манай барилга дан офиссын зориулалттай. Одоо худалдаж авсан болон түрээслэгчид нь дотоод заслаа хийж байгаа” гэх хариулт өгсөн юм. Тэгэхээр зориулалтыг дур мэдэн өөрчилсөн хотын А зэрэглэлийн бүсэд байрлах уг барилгыг Улсын комисс аль хэдийнээ хүлээн авч тэд борлуултаа хийгээд эхэлчихэж гэж харагдаж байна. Хэрвээ Улсын комисс зориулалтыг нь өөрчилснийг нь мэдсэн хэрнээ барилгыг хүлээн авсан бол үүний цаана маш том авлигын хэрэг байгаа гэдгийг хэлэх хэрэгтэй. Учир нь барилгыг Улсын комисс хүлээж авсан учраас иргэн Б.Эрдэнэболд болон “ДМК ЗГБХН” ААН –ийнхэн борлуулалтаа хийсэн гэсэн үг.

Хогийн цэг байсан алга дарам газрын цаад эзэн нь яг хэн бэ. Хэн гэгч эрх мэдэлтэн том толгой гаргаж барилга барих эх зургаа өөрчилж оффисын барилга болгов гэдгийг эрж сурахад Ерөнхийлөгчийн Тамгын газрын дарга Ө.Шижир гэдгийг олон эх сурвалж хэлж байв. Хэдийгээр албан ёсны бичиг баримт дээр Ө.Шижирийн нэр байхгүй ч түүний барилга болох нь баттай хэмээж байсан юм. Учир нь нөлөө бүхий албан тушаал хашиж буй хүмүүс хэзээ ч өөрийнхөө нэр дээр үл хөдлөх хөрөнгөө бүртгүүлдэггүй гэх мэдээллийг ч өгч байсан. Бид дараагийн удаад энэхүү барилгын жинхэнэ эзэн Ө.Шижир мөн эсэх баттай мэдээллийг хүргэх учраас ингээд орхиё. Ямартай ч төрийн ордны хойхно нэлээд хэмжээний газрыг хэн гэгч эрх мэдэлтэн хэрхэн, ямар замаар газар авч эзэмших болсон нь анхаарлын төвд орж, шинэ цагийн “газрын наймаачин”-г олж тогтоох нөр их ажил хуулийнханд үлдэж байна гэдгийг дахин хэлье. Үүгээр ч зогсохгүй хогийн цэг байсан хотын А зэрэглэлийн зүрхэнд орших тус газарт дээрх барилгатай бөөрөө нийлүүлсэн бас нэгэн барилга баригдаж буй учраас уг газрыг хэн хэдэн төгрөгөөр зарж халаасаа дүүргэв. Яагаад барилга барих боломжгүй алга дарам газарт дарга нар газрын зөвшөөрөл өгч цаашлаад барилга барих зөвшөөрөл өгөв гэдгийг цувралаар хүргэх болно.

Албан тушаалтнууд барилгын норм дүрэм зөрчиж бас нэг барилга барих зөвшөөрөл өгчээ.

 

Зориулалтаа өөрчилсөн барилгын эргэн тойронд ямар ч зай талбай байхгүй

Таны харж буй барилга зориулалтаа өөрчилсөн хэрнээ борлуулалтаа хийгээд эхэлжээ.

 

Эх сурвалж: Erennews.mn

2025 он гэхэд гэр хорооллын газрыг дахин төлөвлөн барилгажуулах төслөөр 20,000 орон сууц барьж, ашиглалтад оруулна
СЭРЭМЖЛҮҮЛЭГ: Халдварын тархалт 4 хувиас 9 хувь болон нэмэгдэж байна
Энэ мэдээ хуучирсан буюу 2021/05/18-нд нийтлэгдсэн мэдээ болно.

Шинэ мэдээ