Оросын довтолгоо эхэлснээс хойш Украинаас хоёр сая хүүхэд дүрвээд байгаа талаар НҮБ-ын Хүүхдийн сан лхагва гарагт мэдээлжээ.
Тус байгууллагын мэдээллээр нийт дүрвэгсдийн тэн хагас нь хүүхдүүд байна. Украинаас мягмар гаргийн байдлаар 4.01 сая хүн дүрвээд байгааг НҮБ-ын Дүрвэгсдийн агентлагийн мэдээлэл харуулж байгаа юм.
Хүүхдийн сангийн тооцоолж буйгаар, Украинд 2.5 сая гаруй хүүхэд улс дотроо дүрвэжээ.
Үүний зэрэгцээ хүний наймаа, мөлжлөгт өртөх эрсдэл нэмэгдэж байгааг тус байгууллага анхааруулаад, хүүхдүүдийн аюулгүй байдлыг хангах арга хэмжээг эрчимжүүлэх чиглэлд улс орнуудтай хамтран ажиллаж байгаагаа мэдээлжээ.
Хүүхдийн сангийн гүйцэтгэх захирал Кэтрин Рассел, “Орон гэрээсээ дүрвэж буй хүүхдүүдийн тоо өссөөр байгаа энэ үед хүүхэд бүрд хамгаалалт, боловсрол, аюулгүй байдал, дэмжлэг хэрэгтэй гэдгийг бид санах ёстой” гэж мэдэгдсэн байна.
