Украины дайны өдрүүдийн олон хүний санаанд үлдсэн дүрүүдийн нэг бол нуруун дээрээ нэр ус, төрсөн огноо, эцэг эхийнхээ утасны дугаарыг бичсэн бяцхан охин юм. Вера Маковий хоёр настай. Охины ээж дайны эхний өдрүүдэд түүнийг ор сураггүй алдах, эсвэл амиа алдах вий гэдгээс маш их айж байв.
Гэвч бурхны авралаар тэр хамгийн муу зүйлээс зайлсхийж чаджээ. ВВС Саша Маковиг охин Верагийнх нь хамт Францын өмнөд нутагт байгааг олж тогтоожээ. 33 настай эмэгтэй цөхрөнгөө барсан мөчийнхөө талаар ВВС радиогийн нэвтрүүлэгт ярьсан байна.. Тэрээр Францад очихдоо инстаграмдаа шуугиан тарьсан зургаа нийтэлжээ.
Маковийн хэлснээр, одоо тэр өөрөө сэтгэлзүйн хувьд дарамтад орсон бөгөөд Молдав, Румыныг дайран өнгөрсөн урт удаан замынхаа ядаргаанаас одоо хүртэл салж амжаагүй байна. Гэхдээ тэд одоо хайр, халамжаар хүрээлэгдсэн, амар тайван амьдарцгааж байна.
"Вера сайн байгаа. Тэр дэндүү жижигхэн, юу болоод байгааг ойлгохгүй байна. Тэр надаас ямар нэг зүйлийг мэдэрч байгаа ч ойлгоход хэтэрхий жижигхэн байна. Охиноо тийм насанд байгаад нь маш их баяртай байна. " гэж Саша онцолжээ.
Дайны эхний өдрүүдэд гадаа гарах нь аюултай эсэх нь тодорхойгүй байсан үеэр Саша Киевээс зугтжээ. "Миний хамгийн их айдаг зүйл бол Вера байсан. Төөрөх, эсвэл бид үхэх вий гэсэн айдас. Хэрэв тийм зүйл тохиолдвол тэр хэзээ ч өөрийгөө хэн, ямар гэр бүлээс гаралтай болохыг мэдэхгүй байх байсан" гэж украин эмэгтэй ярьжээ.
