Мягмар гарагт Украины тусгай албаныхан тус улсын сөрөг хүчний намын тэргүүнийг баривчилснаа мэдээлсэн юм.
Виктор Медведчук нь Москвагийн талыг баримтлагч Украины улс төрийн намын дарга бөгөөд эх орноосоо урвасан хэрэгт шалгагдаж, гэрийн хорионд байжээ.
Украинд Оросын цэрэг халдан довтолсны дараахан тэр гэрийн хорионоос оргосон юм байна. Медведчукийг Украинаас гарах гэж явахад нь олж баривчилсан тухай Киевийн албаны эх сурвалж мэдээлсэн юм.
Украины ерөнхийлөгч Володимир Зеленский баривчлагдсан улс төрчөөр өөрийн олзлогдсон хүмүүсийг солилцох саналаа ОХУ-ын талд тавьж байв.
Өчигдөр Кремлийн хэвлэлийн төлөөлөгч Дмитрий Песков уг саналаас татгалзаж байгааг сэтгүүлчдэд мэдэгджээ.
“Тэр бол гадаадын улс төрийн зүтгэлтэн. Оросын иргэн биш. Асуудлыг нь шийдэхэд Оросын талаас оролцохыг өөрөө хүсэж байгаа эсэхийг ч бид мэдэхгүй байна” гэж ярьсан тэрбээр Медведчукийг Украинд явуулж буй “цэргийн ажиллагаа”-тай ямар ч холбоогүй хүн болохыг илэрхийлсэн байна.
Медведчукийг Оросын газрын тосны бизнесээр баяжсан хүн гэгддэг. Тэрбээр ОХУ-ын ерөнхийлөгч Владимир Путинтэй ойр холбоотой хүн бөгөөд отгон охиныг нь Путин загалмайлж байжээ.
Кремлийн эрх баригчид Зеленскийг Украины төрөөс зайлуулсны дараа Медведчукийг өөрийн тоглоомын засгийн газрын тэргүүнээр томилох төлөвлөгөөтэй байсан гэх яриа бий.
Зарим эх сурвалжууд Медведчукийн хөрөнгийн хэмжээг $620 сая гэж тооцоолсон байдаг.
2014 онд Крымийн хойгийг ОХУ өөртөө нэгтгэсний дараа ерөнхийлөгч Барак Обамагийн засаг захиргаа Украины ардчилалд аюул учруулсан үндэслэлээр түүнийг эдийн засгийн хоригоор шийтгэж байжээ.
Эх сурвалж: Business Insider
