НЬЮ-ЙОРК. /VOA/. Украины дайны үр дагавар хөгжиж буй орнуудын эдийн засагт аюул учруулж болзошгүй байгаа талаар НҮБ-ын Ерөнхий нарийн бичгийн дарга Антонио Гутерреш лхагва гарагт анхааруулжээ.

“Ойролцоогоор 1.7 тэрбум хүн /тэдний гуравны нэг нь ядуу амьдарч байгаа/ ядуурал, өлсгөлөн нүүрлэх эрсдэлийг нэмэгдүүлж буй хүнс, эрчим хүч, санхүүгийн системийн тасалдал саатлын нөлөөнд өртөх төлөвтэй байна гэж А.Гутерреш сэтгүүлчдэд мэдээлсэн байна.

Түүний хэлснээр, дэлхийн хамгийн ядуу буурай орнууд багтсан 36 орны буудайн импортын тэн хагасаас илүү хувь нь Орос, Украинаас хамрааралтай байдаг байна. Нэгдүгээр сараас хойш буудай, эрдэнэ шишийн үнэ 30 хувиар өссөнийг тэрбээр эш татаад, “үнэ хэдийнээ өсөөд байсан бол дайн нөхцөл байдлыг улам хүндрүүлж байна” гэж хэлжээ.

Үүсээд буй зөрчил нь нефть, хийн үнийг эрс өсөхөд нөлөөлөөд байгаагийн сацуу улс орнууд одоо Оросын Ерөнхийлөгч Владимир Путиний дайныг санхүүжүүлэх чадварыг нь хязгаарлахын тулд тус улсын эрчим хүчний экспортод хориг тавихаар ажиллаж байгаа талаар олон нийтийн хэвлэл мэдээллийн хэрэгслүүд мэдээлж байна. Орос улс нь мөн дэлхийн бордооны тэргүүлэгч үйлдвэрлэгч бөгөөд бордооны үнэ мөн л хоёр дахин нэмэгдээд байгаа нь ургацын хэмжээг эрс буурахад нөлөөлж болзошгүй байна. А.Гутеррешийн хэлснээр, үнийн өсөлтийг даган өлсгөлөн, хоол тэжээлийн дутагдал нэмэгдэнэ.

НҮБ-ын тэргүүн дэлхийн инфляцын өсөлт нь худалдан авах чадварыг бууруулж, дотоодын өсөлтөд сөргөөр нөлөөлж, хөгжлийг сааруулж, улмаар ахиц дэвшлийг бууруулж байгаад санаа зовниж буйгаа илэрхийлжээ. Тэрбээр хөгжиж буй орнууд их өрөнд нэрвэгдээд байгааг мөн дурдсан байна.

ОХУ-ын түрэмгийлэл эхэлсний дараа томилогдсон Дэлхийн хямралд хариу арга хэмжээ авах бүлгийн ажлын хэсгийн анхны тайланг танилцуулах үеэр тэрбээр дээрх мэдэгдлийг хийжээ. Энэхүү тайланд хүнс, эрчим хүч, санхүүгийн тасалдал саатлын нөлөөг бууруулах, тодруулбал, нээлттэй зах зээлээр дамжуулан хүнс, эрчим хүчний тогтвортой урсгалыг хангах, экспортын шаардлагагүй хязгаарлалтыг цуцлах зэрэг хэд хэдэн зөвлөмжийг санал болгожээ. Хүнсний хангамжийн хувьд ажлын хэсэг илүүдэл бүтээгдэхүүнээ хэрэгцээтэй орнуудад илгээж, хүнсний үнийг өсгөхгүй байхыг уриалж байна. Харин шатахууны тал дээр Засгийн газруудад стратегийн нөөцөө ашиглахыг уриалжээ.

А.Гутерреш, “Энэ бол улс орон тус бүрээр, уялдаа холбоогүйгээр шийдэж болох хямрал биш. Үүсээд буй онцгой байдал нь дэлхий нийтийг хамарсан хийгээд зохион байгуулалттай шийдлийг шаардаж байна” гэдгийг онцолсноос гадна хамгийн гол шийдэл нь дайныг зогсооход оршиж байгааг мөн цохон тэмдэглэсэн байна.

Э.Хулан

Эх сурвалж: "Монцамэ" агентлаг