Энэ жил Ардын хувьсгалын 101 жилийн баяр наадмыг 100 жилийн тэгш ойтой хамтатган өргөн дэлгэр тэмдэглэхээр Засгийн газрын тогтоол гарсан. Түүнчлэн өнөө жил Их эзэн Чингис хааны мэндэлсний 860 жилийн ой тохиож байгаа юм. Түүхэн үйл явдал давхацсан энэ жилийн наадмын нээлт, хаалтыг болон хүндэтгэлийн концертыг найруулах найруулагчийн талаарх таамаг өчигдрөөс эхлэн олон нийтийн дунд өрнөөд буй.

Тэгвэл энэ талаар Соёлын дэд сайд М.Батбаяраас тодрууллаа. Тэрээр "Энэ жил үндэсний баяр наадмыг уламжлалт хэлбэрээр зохион байгуулна. Үндэсний их баяр наадмын тухай хуулиар наадмыг зохион байгуулах хороог Шадар сайд ахалдаг. Түүнчлэн наадмын нээлт хаалтын ажиллагаа, төрийн хүндэтгэлийн концертыг Урлаг соёлын салбар хороо хариуцдаг. Энэ хороог миний бие ахалдаг. Наадмын найруулагчийн тухайд, Үндэсний их баяр наадмыг зохион байгуулах хороо томилж, баталдаг. Урлаг соёлын салбар хорооноос наадмыг найруулах боломжтой 19 хүний нэрийг зохион байгуулах хороонд санал болгохоор бэлтгэж байна. Тавдугаар сарын 13-ны өдөр хуралдаж, эцэслэн шийднэ. Баяр наадмын төсвийг мөн энэ өдөр батална гэж бодож байна. Үндэсний их баяр наадам гэдэг монголчуудын эв нэгдлийг илэрхийлэх үндэсний хамгийн том баяр. Тиймээс ийм хэмжээний арга хэмжээ найруулах боломжтой хүмүүсийн нэрийг гаргасан" гэлээ.