Даваа гарагт Европын Холбооны удирдлагууд Оросын газрын тосны импортод хэсэгчилсэн хориг тавих тохиролцоонд хүрсэн байна.
Энэ удаагийн хориг зөвхөн далайгаар тээвэрлэсэн газрын тосны импортод үйлчлэх ба дамжуулах хоолойн импортод үйлчлэхгүй ажээ.
Ингэснээр Оросын газрын тосны импортын гуравны хоёроос илүү хэсэг хоригт орж, Украинд явуулж буй дайны машины томоохон санхүүжилт хаагдаж байгааг Евро Зөвлөлийн ерөнхийлөгч Шарль Мишель твиттер хуудсандаа мэдэгдсэн байна.
Украинд эзлэн түрэмгийлэх дайн явуулсантай холбоотойгоор Европын Холбоо өмнө нь таван ээлжийн хориг арга хэмжээг ОХУ-ын эсрэг зарлаад байгаа.
Эдгээр хоригт Оросын нүүрсний болон банк санхүүгийн салбар, ерөнхийлөгч Владимир Путин тэргүүтэй мянга гаруй хувь хүн хамрагдсан юм.
Европын Холбоо нь газрын тосны хэрэгцээнийхээ 25 хувийг, байгалийн хийн хэрэгцээнийхээ 40 хувийг ОХУ-аас импортолдог.
Газрын тосны бүрэн хориг тавих асуудал дээр тус холбооны гишүүн 27 улс нэгдсэн зөвшилцөлд хүрч чадахгүй байсан юм.
Тухайлбал Унгар улсын ерөнхий сайд Виктор Орбан өөрийнх нь улсын газрын тосны нийлүүлэлтэд баталгаа гаргаж өгөөгүй тохиолдолд хоригт нэгдэхээс татгалзаж байв.
Далайд гарцгүй Унгар улс газрын тосны хэрэгцээнийхээ 60 гаруй хувийг ОХУ-аас импортолдог. Ингэхдээ Зөвлөлтийн үед байгуулагдсан Дружба дамжуулах хоолойгоор авдаг юм.
Даваа гарагт Украины ерөнхийлөгч Володимир Зеленский видео холбоогоор Европын Холбооны удирдлагуудад хандаж үг хэлэхдээ “маргаан зөрчлөө арилгаж, Оросын эсрэг хоригоо яаравчлахыг” уриалсан байна.
Эх сурвалж: Associated Press
