Америк HIMARS төхөөрөмжийг Украинд нийлүүлснээр юуг ч өөрчлөхгүй, учир нь энэ нь Зөвлөлт ба Орост үйлдвэрлэсэн Град, Смерч, Ураган зэрэг системтэй адил юм гэж ОХУ-ын Ерөнхийлөгч Владимир Путин "Россия 1" сувагт ярилцлага өгөхдөө мэдэгдэв.
Тэрбээр "Тус төхөөрөмжийн тусгал нь системээс биш, харин хэрэглэж буй пуужингаас шалтгаална" гэж онцлоод, хэрвээ Украин алсын тусгалтай пуужинг хүлээн авбал Орос хараахан цохилт өгч амжаагүй байгаа объектуудад цохилт өгөх болно гэв.
Ерөнхийлөгч Путин "Америкчууд ямар пуужин нийлүүлэхээс хамаарна. Харин өнөөдөр бидний сонсож, ойлгож байгаа зүйл бол төрлөөсөө хамааран 45-70 км нисдэг пуужингууд юм. Миний дурдсан "Град", "Урагон", "Торнадо"-уудад мөн адил, тэд бас 40-70 км-ийн зайд тусна. Шинэ зүйл байхгүй" гэж хэлэв
6-р сарын 1-нд АНУ-ын Украинд өгөх шинэ зэвсэг, цэргийн техник хэрэгсэлд Украины армийн удаан хугацааны турш авахыг хүсч байсан HIMARS олон пуужин хөөргөх систем багтсан болохыг баталсан юм.
"HIMARS нь Украинчуудад тулалдах илүү боломж олгох болно. Одоо бидний өмнө нь өгсөн гаубицууд 30 км-ийн зайд буудах боломжтой. HIMARS-ийн тусгал нь үүнээс хоёр дахин хол бөгөөд энэ нь тэдэнд шинэ боломж олгоно. Тэд цөөхөн пуужин харвагчтай байсан ч Оросын цэргүүдийг илүү амжилттай эсэргүүцэх болно" гэж АНУ-ын Батлан хамгаалахын дэд сайд Колин Кал Пентагон дахь хэвлэлийн бага хурал дээр хэлэв.
Америкчуудын нийлүүлэх HIMARS-ын пуужингийн хэмжээг хараахан мэдээлээгүй байгаа ч эдгээр нь өндөр нарийвчлалтай GMLRS пуужингууд байна гэдэг нь тодорхой болсон.
Америкийн пуужин харвагчдад зориулсан сум нь өөр өөр тусгал бүхий гурван төрөлд хуваагддаг. Эхнийх нь дээд тал нь 32 километрийн тусгалтай M26 пуужин эсвэл 45 км хүртэлх тусгалтай орчин үеийн сайжруулсан M26A1 пуужин юм. Ийм зургаан пуужинг нэг суурь төхөөрөмжид хийдэг.
Харин хоёр дахь сум нь 70 км хүртэлх тусгалтай GMLRS удирдлагатай пуужин юм. Эцэст нь зургаан пуужинтай ердийн чингэлэгийн оронд 300 километрийн тусгалтай нэг АТАКМС тактикийн пуужинг хоёр блокийн аль нэгэнд нь байрлуулж болно. Энэ төрлийн сумыг АНУ-аас Украинд нийлүүлнэ гэсэн мэдээлэл одоогоор гараагүй байна.
Эх сурвалж: Toim.mn