Манай парламентын "Малена" саяхан тойргийнхоо төрийн албан хаагчдын өөхийг 70.000.000 төгрөгөөр шатаана гэжээ. Гуалиг гишүүнтэй тойрог ийм гоё. Гарьд ч гэсэн галбиртай бөхийн тоонд явсан. Завханыхан ч азтай юмаа. Шинэ жилээр санаа зовохгүй нь...
Гэтэл хэрэг бишдэж улсууд гишүүнийг сошиалаар нэг шүүмжлээд эхлэв. Бусад аймгийн тарган хүмүүс Завханыхныг турчихна гээд атаархсан юм болов уу.
Гээд бодлоо. Тарган, таргалалт, хэвлийн өөх, өөх шатаах, илүүдэл жин, харвин, гэдэс, гүзээ... Үүнийг уншиж буй та сая тэлээн дээгүүрээ давсан тэр нэг зөөлөн эдийг барьж үзэв үү дээ. Үнэндээ наадах чинь таны, миний, "Малена"-гийн, Монголчуудын шийдвэл зохих асуудлуудын айргийн тавд давхиж явна. Тарган мал тал бүрийн ашигтай бол тарган хүн тал бүрийн өвчтэй. Яаж турах вэ, турах юмсан, турчмаар байна, тураагаад өгөөч, турчуул л боллоо доо гэж эмэгтэйчүүд санаа алдан гуниглана. Туранхай нэгнийг таргалчих вий гэсэн айдас сүүдэр мэт дагана. Гүзээнээс салах бодол эрчүүдийн толгойд эргэлдэнэ. Зургаан толгой ч өнгөрч "ёотон"-той болж зуун грамм, тавжины тарган гуянаасаа салчих вий гэж битүүхэн санаа зовно. Завхан дээр нэмэх нь 20 аймагт, төрийнхнийг ч хэлэлтгүй хувьд ч "буяны тарга" бол асуудал. Илүүдэл жин иргэдийн эдийн засаг, эрүүл мэндэд илүү жин дарж байна. Эмнэлэгт хандсан иргэдэд эмч эхлээд илүүдэл жингээ хасахыг зөвлөнө. Ингээд илүүдэл жингээ хасахын тулд илүүдэл зардал гаргана. 70 кг даацтай үе мөчин дээрээ 80, 90, 100 кг ачаад явна. Үүнээс болж таниас үнэ өндөртэй үе мөчний тос үнэртэж байна.
Иймээс өөхийг шатаах нь зөв үү. Yes.
- Тэгвэл юунд уурлаад байгаа юм.
- Дорнодын Доржийн төлсөн татварын мөнгөөр Завханд байгаа Цэцэгийн тайлыг гаргах гээд Эрүүл мэндийн сайдаас мөнгө шаналгасан бичлэг нь энэ байна.
Төрөөс бүү хэл хувиасаа сохор зоос гаргахгүйгээр турах олон арга бий шүү. Хоолны дараа хорин минут гэдсээ илэн хэвтэх бус гэр бүлээрээ алхаж болно. Ажил руугаа эртхэн гараад таваргах хэрэгтэй. Тураахгүй ч таргалуулахгүй. Энэ бүгдийг надаар хэлүүлэлтгүй мэдэж байгааг тань мэдэж байна. Тайл гаргах төсөв тачирхан орлоготой Монголд минь бий билүү. "Хатан эрдэнэ"-ийн жорлонгийн асуудал булан тойроогүй байхад шүү. Хүрээний хөрсний бохирдол гамшиг мөн үү. Мөн. Гэхдээ жорлонг жорлонгоор солих нь шийдэл мөн үү. Манай "Политикийн поп дива" нар төсвийн мөнгийг дуулхаар оргилдог булаг шиг л санах юм. Яндаж болдоггүй далай шиг яасан их төсөв бэ, ямар их хувь заяагаар би гишүүн болж сонгогдвоо гэлтэй аашилна. Тарган биеийг нь бус тархи толгойг нь фитнесдүүлбэл дээр бус уу. Тойргийнхноо тордох гэж буйг тань ойлгож байна. Сонгуулийн тогтолцоо олон гишүүнийг мэдсээр байж ийм байдал руу түлхдэг. Нэг аймгийнханд тал засах гэж бусад 20 аймгийнхний элэг доог болдог. Үндсийг таслах тал дээр бодохгүй бол үр жимс нь та нарыг ч ард иргэдийг ч хордуулсаар байх болно.
330 сумаас цугласан татвар хэдэн том үйлдвэр болохын оронд эргээд эрэг, шураг боолтоороо салаад энд тэндхийн жалга довонд шингэн уусна.
Чихэр боов, битаан, бакаал, гурил, будаа, түлээ нүүрс, одон медалийн цуваа уул толгод, хөндий талаар тоос татуулан давхисаар байх болно. Алгаа тоссон ах эгч, аав ээж, эмээ өвөө нар төрсөөр байх болно.
Жич: Бүх юмны үнэ өсөж байна. Гурил, будаа гээд таргалуулдаг, байцаа, өргөст хэмх гээд тураадаг хүнсний үнэ тэнгэрт хадчихлаа. Төрийн албан хаагчийн аманд ч үгүй хамарт ч үгүй цалин аяндаа тэднийг тураах болноо, гишүүнээ...
Ч.Явуухүү
sonin.mn
