Оросын үндсэн нутаг дэвсгэрээс хуурай газраар тусгаарлагдсан бүс нутаг болох Калининград чиглэлийн ачаа тээврийг Литва улс өчигдрөөс эхлэн нутаг дэвсгэр дээгүүрээ дамжуулахыг зогсоожээ.
Үүнийгээ Украины дайнтай холбоотой Европын Холбооны тавьсан эдийн засгийн хоригийн нэг хэсэг гэж Вильнюсийн эрх баригчид тайлбарлаж байна.
Хагас сая хүн амтай Калининград муж нь Польш, Литва улсуудтай хил залгаж, Балтийн тэнгисийн эрэгт оршдог. Тус муж ОХУ-ын бусад газар нутагтай хуурай газраар шууд холбогддоггүй юм.
Калининград чиглэлийн ачаа тээврээ ОХУ зөвхөн Балтийн тэнгисээр явуулах боломжтой гэж Литвийн албаныхан үзэж байна.
Дээрх шийдвэртэй холбоотойгоор ОХУ-ын гадаад хэргийн яам Литвийн Москва дахь дипломат төлөөлөгчид эсэргүүцэл илэрхийлжээ.
“Хэрвээ ойрын үед Калининград муж болон ОХУ-ын бусад нутаг дэвсгэрийн хооронд Литвээр дамжин өнгөрөх транзит ачаа тээвэр сэргээгдэхгүй бол Орос улс үндэсний эрх ашгаа хамгаалах үүднээс хатуу арга хэмжээ авах болно” гэж тус яам мэдэгдсэн байна. Бас Литвийн тавьсан хоригийг “илэрхий дайсагнасан” шинж чанартай гэж тодорхойлжээ.
Калининград мужийн захирагч Антон Алиханов энэхүү хориг арга хэмжээний улмаас тус мужийн импортын бараг тал хувь нь зогсож байгааг мэдээлээд Литвийн эсрэг хариу арга хэмжээ авахыг засгийн газартаа уриалсан байна.
Кремлийн хэвлэлийн төлөөлөгч Дмитрий Песков “Урьд өмнө нь гарч байгаагүй шийдвэр боллоо. Ингэснээр бүх дүрэм журмыг зөрчиж байна. Европын Холбоо хориг арга хэмжээгээ транзит ачаа тээвэрт хамаатуулж эхэлсэн гэж бид ойлголоо. Энэ бол хууль бус үйлдэл юм” гэж мэдэгджээ.
Эх сурвалж: AFP
