Урлаг, соёлын төлөөллүүд хамтран зургаадугаар сарын 24-нд "The night with us" нэртэй тоглолтыг цэнгэлдэх хүрээлэнд хийхээр товлосон боловч Улсын баяр наадмын бэлтгэл ажилтай холбоотойгоор урлагийн тоглолтыг цуцалжээ. Энэ талаар Камертон хамтлагийн дуучин Д.Мэнд-Амар сэтгүүлчдэд мэдээлэл өглөө.
Тэрбээр “Төв цэнгэлдэх хүрээлэнд энэ сарын 24-ний өдөр Камертон, Харанга, Никитон, Гурван охин хамтлагын уран бүтээлчдийн хамтарсан тоглолтыг гэнэтийн шийдвэрээр цуцаллаа. Учир энэ жилийн улсын Их баяр наадмыг өргөн дэлгэр тэмдэглэн өнгөрүүлэх учраас төв цэнгэлдэх хүрээлэнгийн эргэн тойронд тохижилт, аж ахуйн маш олон ажил хийгдэх тул тоглолтыг цуцалж байгаа талаарх тайлбар өгсөн. Тиймээс бид тухайн талбайд арга хэмжээ зохион байгуулах боломжгүй болсон ч зорилгоосоо буцахгүй. Олон сар бэлдсэн уран бүтээлчдийнхээ хамт хүүхдийн паркад тоглолтоо зохион байгуулахаар боллоо. Бидний тоглолтыг цуцалсан нь маш гэнэтийн шийдвэр байлаа. Энэхүү тоглолтод бидний маш олон сарын хөдөлмөр, тодорхой хэмжээний хөрөнгө, зардал шингэсэн. Түүнчлэн маш олон тасалбар худалдаанд гарчихсан байгаа. Тиймээс манай тоглолт болдгоороо болно. Үзэгчидтэйгээ хүүхдийн паркад уулзацгаая” хэмээн хэллээ.
