Өнгөрсөн сард Энэтхэгийн эрх баригч намын өндөр албан тушаалтнууд Исламын шашныг үндэслэгч зөнч Мухаммедыг доромжилсон агуулгатай зүйл ярьсан нь тус улсад шашин хоорондын хагарал зөрчлийг эрчимжүүлсэн юм.

Шашны зөрчил хилийн дээсийг давж, Ойрх Дорнодын орнууд болон Энэтхэгийн харилцаа муудаад байгаа.

Тэгвэл энэхүү зөрчил дээр гал нэмсэн хэрэг саяхан гарчээ. Мягмар гарагт Энэтхэгийн умард бүсийн Ражастан мужид хоёр муслим эрэгтэй хиндү шашинтан эрэгтэйн толгойг тастаж, аллагынхаа дүрс бичлэгийг онлайн орчинд тараасан байна.

Хохирогч нь зөнч Мухаммедыг доромжилсон улс төрчдийг дэмжиж байгаагаа сошиал сүлжээнд илэрхийлсэн нь аллага гарах шалтгаан болжээ.

Аллагыг үйлдсэн хоёр этгээдийг орон нутгийн цагдаагийн газар баривчилсан байна.

Тэд аллагаа дүрсжүүлж харуулахдаа Энэтхэгийн ерөнхий сайд Нарендра Модигийн амь насанд заналхийлж байжээ.

Модигийн засгийн газрын үед хиндү шашныг хэт дөвийлгөж, ислам шашны цөөнхийг гадуурхах явдал нэмэгдсэн гэгддэг.

Энэтхэгийн 1.4 тэрбум орчим хүн амын 200 орчим сая нь муслим бөгөөд дэлхийн нийт ислам шашинтнуудын 10 гаруй хувь болдог.

Энэхүү аллагын дараа шашин хоорондын мөргөлдөөн гарахаас сэргийлэх арга хэмжээнүүдийг эрх баригчид авч эхэлсэн байна.

Ражастан мужийн захирагч Ашок Гехлот иргэдэд тайван, хүлээцтэй байхыг уриалжээ. Бас аллагын дүрс бичлэгийг цацахыг хэвлэл мэдээллийн байгууллагуудад хориглож, Ражастаны том хотуудад интернэт үйлчилгээг хязгаарласан байна.

Хот суурин газруудад цагдаагийн хүчийг нэмэгдүүлж, олон хүн нэг дор цугларахыг хориглож, хөл хорионы дэглэм зарлажээ.

Энэтхэгийн исламын шашны байгууллагууд аллагыг буруутгасан мэдэгдэл хийсэн байна. Аллагын хэргийг шалгах үүргийг Энэтхэгийн засгийн газар тус улсын терроризмтой тэмцэх дээд байгууллага Үндэсний Мөрдөн Байцаах Агентлагт даалгажээ.

Эх сурвалж: BBC