Япон улсын үүрэн холбооны хоёр дахь том оператор KDDI компанийн сүлжээнд энэ сарын эхээр томоохон саатал гарснаас олон сая хэрэглэгчийнх нь үйлчилгээ тасалдсан юм.
Хохирогчдын ихэнх нь голдуу гар утсаар дуудлага хийдэг ахмад насны хэрэглэгчид байжээ. Тэгвэл KDDI компани долдугаар сарын 29-ний өдөр буюу ирэх Баасан гарагт хэрэглэгчдийнхээ хохирлыг барагдуулах төлөвлөгөөг зарлахаар болсон байна.
Яг ямар аргаар хохирлыг барагдуулах талаар мэдээлэл одоохондоо ил болоогүй байна. Долдугаар сарын 2-ны өдөр KDDI компанийн сүлжээнд тасалдал гарсан нь нэлээд хугацаанд үргэлжилж, долдугаар сарын 5-ны өдөр бүрэн сэргэж байжээ.
Тасалдал нийтдээ 86 цаг үргэлжилж, хэрэглэгчдийнх нь 60 орчим хувийн буюу 39.15 сая гар утас хэрэглэгчийн ажиллагаанд нөлөөлсөн байна.
KDDI хэрэглэгчтэй байгуулсан гэрээндээ техникийн саатал доголдол 24-өөс дээш цаг үргэлжилсэн тохиолдолд хохирлыг барагдуулахаар заасан байдаг гэнэ.
Тус компани бас гарсан гэмтэл саатлын талаар болон дахин ийм доголдол гаргахгүй байхын тулд ямар арга хэмжээ авах талаар дэлгэрэнгүй тайланг ирэх долоо хоногт засгийн газрын зохицуулах байгууллагад танилцуулахаар болжээ.
Эх сурвалж: Kyodo News