Өнгөрсөн амралтын өдрүүдэд ОХУ-ын Дагестаны Бүгд Найрамдах Улсын нийслэл Махачкала хотод цэргийн дайчилгааг эсэргүүцсэн иргэдийн тэмцэл өрнөх үеэр эрх баригчид 100 гаруй хүнийг баривчилжээ.
Ар Кавказын муслим голдуу хүн амтай Дагестан нь Оросын холбооны хамгийн ядуу субъектуудын нэг юм.
Украины дайнд амиа алдсан цэргүүдийн тоог хүн амын тоотой нь харьцуулбал ОХУ-ын бүс нутгуудаас Дагестан тэргүүлж байгаа.
Сошиал сүлжээнд дайчилгааг эсэргүүцсэн иргэд цэрэг, цагдаагийн албан хаагчидтай мөргөлдөж буйг харуулсан олон арван дүрс бичлэг тараад байна.
Махачкалад гарсан мөргөлдөөний үеэр хууль хүчнийхэн цочроогч буу, бороохой зэрэг зэвсэг хэрэглэснийг гэрчүүд мэдээлжээ.
Иргэд “Орос улс бусдын газар нутагт дайтаж байна”, “Яагаад бидний үр хүүхдийг авах гээд байгаа юм бэ?”, “Украин руу хэн халдсан юм бэ? Орос халдсан”, “Дайнаа зогсоо” гэх зэргээр хашхирч байжээ.
A group of women successfully chases away a lone policeman at an anti-mobilisation protest in Dagestan https://t.co/TBCl9khPGK pic.twitter.com/jwJLqVPIcO
— Francis Scarr (@francis_scarr) September 25, 2022
Дагестаны Эндирей тосгоны иргэд цэргийн дайчилгаа явуулахаар ирсэн албан хаагчдыг нэвтрүүлэхгүйн тулд зам дээр автомашинуудаараа хориглолт байгуулсан байна. Энэ үеэр цагдаа нар автомат буугаар хий буудаж иргэдийг тараахыг оролдсон ч үр дүнд хүрээгүй тухай OVD-Info хүний эрхийн байгууллага мэдээлжээ.
Бухимдсан иргэдийг тайвшруулахын тулд Дагестаны засаг захиргааны тэргүүн Сергей Меликов өчигдөр мэдэгдэл хийж, дайчилгаа явуулах үеэр алдаа гаргаснаа хүлээн зөвшөөрсөн байна.
“Өмнө нь ярьж байснаа би давтан хэлье. Цэргийн хэсэгчилсэн дайчилгааг явуулахдаа ерөнхийлөгчийн зарласан шалгуур нөхцөлийг хатуу дагах ёстой байсан” гэж тэр Телеграм хуудсандаа тайлбарлан бичжээ.
Украинд илгээсэн Дагестаны цэргүүдээс 301 нь алагдсан гэсэн албан ёсны тоо бий. Энэ нь Москвагаас татагдсан цэргүүдийн хохирлоос 10 дахин өндөр тоо юм. Гэхдээ бодит тоо үүнээс хамаагүй өндөр байх магадлалтай гэж ажиглагчид үзэж байгаа.
Лхагва гарагт ОХУ-ын ерөнхийлөгч Владимир Путин цэргийн хэсэгчилсэн дайчилгаа зарласнаас хойш эсэргүүцэл илэрхийлсэн нийт 2,000 гаруй хүн баривчлагдаад байна. Олон мянган залуус дайчилгаанаас зугтан хөрш зэргэлдээ улс орнууд руу дүрвэж эхэлсэн юм.
Эх сурвалж: BBC
