Европ тив энэ өвлийг Оросын эрчим хүчний импортгүйгээр хэрхэн давах аргаа хайсаар байна.
Тус тивд Оросоос нийлүүлдэг байгалийн хийн ихэнхийг хэрэглэдэг Герман улсын хувьд энэ өвөл нэлээд хүнд тусахаар байгаа.
Мягмар гарагт Bild-TV сувагт өгсөн ярилцлагадаа Германы ахмад улс төрч хатуу анхааруулгыг ард иргэддээ өгсөн байна.
80 настай Вольфганг Шойбле нь Германы бундестагийн гишүүн бөгөөд өмнө сангийн сайд, бундестагийн ерөнхийлөгчөөр ажиллаж байжээ.
“Ард түмэн одоо гонгиноод хэрэггүй. Цаашдаа олон зүйл баталгаагүй болж байгааг ойлгож, ухамсарлах хэрэгтэй. Тиймээс хэдэн лаа, чүдэнз, гар чийдэн бэлдэх хэрэгтэй. Зузаан цамцтай бол, магадгүй хоёр дахь цамц ч хэрэг болно” гэж Шойбле ярьсан байна.
Тэрбээр цааш нь ярихдаа “Бид хүмүүст бүх зүйл хязгааргүй мэт ойлгуулдаг нь буруу. Тэгвэл хүмүүс төр засагт бүгдийг даатгаж, бэлэнчилдэг болно” гэж эрх баригчдад анхааруулжээ.
Украинд дайн өдөөсөн шалтгаанаар Өрнөдийн орнууд ОХУ-д эдийн засгийн хориг тавьж, хариуд нь Кремлийн эрх баригчид эрчим хүчний нийлүүлэлтээ тасалдуулаад байгаа.
Үүний улмаас Европ даяар эрчим хүчний хямрал нүүрлэж, хүнсний болон өргөн хэрэглээний бараа бүтээгдэхүүний үнэ өсөөд байна.
Эрчим хүчний хязгаарлалт Европын олон оронд хэрэгжиж эхлээд байгаа. Тухайлбал Герман улсад усан сангийн халаалтыг хориглосноос иргэд бүлээн усанд сэлэх боломжгүй болсон бол Испани улс нийтийн эзэмшлийн байгууламжуудын халаалтыг Цельсийн 19 хэмээс хэтрүүлэхийг хориглосон юм.
Эх сурвалж: Business Insider
