Их Британийн түүхэнд хамгийн богино хугацаанд ерөнхий сайдын албыг хашсан Лиз Трасс үлдсэн амьдралынхаа туршид жил бүр төсвөөс $129,000-тай тэнцэх тэтгэмж авахаар болжээ.

Тэрбээр 44 хоног ерөнхий сайдын албан тушаалд тэссэн нь хуулийн дагуу ийм тэтгэмж авах эрхтэй болгосон байна.

Гэхдээ энэ мөнгийг тэр хувьдаа зарцуулах ёсгүй, зөвхөн ерөнхий сайд байсан хүнийхээ хувиар албан оффис ажиллуулах, туслах цалинжуулахад зарцуулах гэнэ.

Зарим хүмүүс ийм богино хугацаанд ерөнхий сайдаар ажилласан хүнд ийм тэтгэмж өгөх ёстой эсэхэд эргэлзэж байгаагаа илэрхийлж байна.

“Public Duties Costs Allowance” нэртэй ийм зардлыг 1991 онд Маргарет Тэтчерийг албан тушаалаасаа буухад түүний залгамжлагч Жон Мэйжор санаачилж байжээ.

Зорилго нь ерөнхий сайд асан эрхмүүд нийгмийн дунд ажиллаж, амьдрахад дэмжлэг үзүүлэх юм байна.

Ерөнхий сайд асан хүмүүс үүнээс гадна бас цалин хангамж авдаг.

Хэрвээ тэд төрийн албанд дахин ажиллах бол олгох тэтгэмжийн хэмжээг нь бууруулдаг байна.

Ерөнхий сайд асан нас барвал туслахынх нь цалинг үргэлжлүүлэн гурван сар олгох журамтай ажээ. Бас албан офисыг нь хаахтай холбоотой зардлыг гаргадаг байна.

Одоогоор Их Британийн засгийн газар экс ерөнхий сайд нарынхаа нийт цалин хангамж, тэтгэмжид жил бүр $645,879 орчмыг зарцуулж байгаа ажээ.

Харин Лиз Трассыг хэтэрхий богино хугацаанд ерөнхий сайдаар ажилласан тул дээрх тэтгэмжээс сайн дураараа татгалзах ёстой гэсэн хүмүүс олон байна.

Эх сурвалж: Tribune News Service