Украины дайнтай холбоотойгоор авсан эдийн засгийн хоригийн хариуд ОХУ байгалийн хийн нийлүүлэлтээ бууруулсан нь Европ тивийг эрчим хүчний хямралд оруулсан билээ.
Дайн эхэлснээс хойш Европын орнууд байгалийн хийг их хэмжээгээр нөөцөлж эхэлсэн юм. Дамжуулах хоолойгоор нийлүүлэгддэг Оросын хийг далайгаар тээвэрлэсэн АНУ, Катарын шингэрүүлсэн хийгээр орлуулж байв.
Тэгвэл өнөөдрийн байдлаар Европын орнуудын хий нөөцлөх байгууламжууд дүүрэхэд ойртжээ. Сүүлийн нэг долоо хоногийн хугацаанд байгалийн хийн фючерсийн үнэ 20 хувиар унаж, наймдугаар сарын оргил үеэсээ 70 хувиар унаад байна.
Европын боомтууд дээр суллах савны багтаамж хүрэлцээгүйн улмаас хий тээвэрлэгч хөлөг онгоцнууд хүлээлтийн урт дараалал үүсгэжээ.
Даваа гарагт Нидерландын бирж дээр цагийн дотор хүргэх нөхцөлтэй хийн үнэ 0 еврогоос доош унасан нь ховор сонин үзэгдэл болсон байна.
Европын Холбооны хий нөөцлөх байгууламжуудын багтаамж 94 хувьдаа хүрснийг Gas Infrastructure Europe байгууллагын тоо баримт харуулжээ.
Энэ оны арваннэгдүгээр сард 80 хувьд хүргэх анхны зорилго ийнхүү хол давж биелсэн байна. Сүүлийн таван жилийн дунджаас харвал Европын Холбооны нөөцийн дүүргэлт дээд тал нь 87 хувьд хүрч байжээ.
Одоогоор нийт $2 тэрбумын дүнтэй шингэрүүлсэн хий ачсан 35 хөлөг онгоц Европын боомтууд дээр хүлээгдэж байгааг шингэрүүлсэн хийн тоо баримт боловсруулдаг Vortexa компани мэдээлсэн байна.
Европын зах зээлд байгалийн хий илүүдэх болсон шалтгаан нь тус тивийн орнуудад ер бусын дулаахан намар болж байгаатай бас холбоотойг мэргэжилтнүүд тайлбарлаж байна.
Гэхдээ ийм нөхцөл байдал удаан үргэлжлэхгүй, арванхоёрдугаар сард хүйтрэх үед хийн эрэлт буцаад нэмэгдэж болзошгүйг анхааруулжээ.
Одоогоор Европын байгалийн хийн мегаватт цагийн фючерсийн үнэ 100 евро орчимд хэлбэлзэж байна. Энэ нь өнгөрсөн оны аравдугаар сарын ханштай харьцуулахад 126 хувь орчим өндөр үзүүлэлт юм.
Жилийн өмнө цар тахалтай холбоотой хоригууд цуцлагдаж, эдийн засаг сэргэж эхэлсэн нь хийн үнэ тарифыг үлэмж хэмжээгээр бууруулаад байжээ. Европ тив энэ өвлийг давж чадсан ч хийн үнэ цаашдаа дайны өмнөх хэмжээнд хүртэл буурахгүй гэж судлаачид дүгнэж байна. Учир нь Оросын хийг орлуулах найдвартай эх үүсвэртэй болох хүртэл хямрал үргэлжлэх гэнэ.
Тухайлбал 2023 оны эцсээр хийн мегаватт цагийн үнэ 150 евро хүрэх тооцоог Capital Economics компанийн эдийн засагчид гаргажээ.
Эх сурвалж: CNN