Лхагва гарагт ОХУ-ын эрх баригчид цөмийн дайны дадлага сургуулилалт зохион байгуулсан нь Украинд дайн эхэлсэн цагаас хойших анхны тохиолдол боллоо.
Тус улсын ерөнхийлөгч Владимир Путин сургуулилалтын явцыг өөрийн биеэр ажигласан байна.
Батлан хамгаалахын сайд Сергей Шойгу уг ажиллагааны үеэр гаднаас ОХУ руу цөмийн зэвсгээр довтолсон тохиолдолд хариу цөмийн цохилт өгөх зохиомол нөхцөл дээр сургуулилсныг Путинд илтгэжээ.
Энэ үеэр "Ярс" тив алгасах баллистик пуужинг Оросын умард хязгаарын Плесецк баазаас харвасан байна. Мөн Баренцын тэнгист байрлаж байсан шумбагч хөлөг онгоцноос "Синева" баллистик пуужинг алс дорнодын Камчаткийн хойг дахь бай руу харваж, Ту-95 стратегийн бөмбөгдөгч онгоцноос далавчит пуужингуудыг мөн бэлдсэн бай руу харваж туршжээ.
Сургуулилалтын үеэр харвасан пуужингууд бүгд байгаа онож, даалгавар бүрэн биелсэн тухай Кремлийн ордноос сүүлд мэдээлсэн байна.
ОХУ-ын энэхүү арга хэмжээ нь НАТО-гийн жил тутмын цөмийн зэвсгийн сургуулилалттай цаг хугацааны хувьд давхцаж байгаа юм.
Европ тивийн баруун хойд хэсэгт эхэлсэн сургуулилалт аравдугаар сарын 30 хүртэл үргэлжилнэ. “Steadfast Noon” нэртэй уг ажиллагаанд байлдааны 60 нисэх онгоц оролцож байгаагийн дотор АНУ-ын алсын нислэгийн B-52 бөмбөгдөгч оролцож байгаа.
ОХУ-ын өмнөх цөмийн зэвсгийн сургуулилалт тус улсын цэрэг Украинд цөмрөн орохоос хэдхэн хоногийн өмнө зохион байгуулагдаж байжээ.
Сүүлийн өдрүүдэд ОХУ-ын эрх баригчид Украин улсыг цацраг идэвхт бодисоор хордуулдаг цөмийн бус зэвсэг хэрэглэхээр бэлдэж байгаа гэх мэдээллийг олон улсад тарааж байгаа.
Путин өчигдөр хэлэхдээ “Бохир бөмбөг гэгддэг зэвсгийг өдөөн хатгалгын зорилгоор хэрэглэх төлөвлөгөөтэй байгааг бид мэдэж байна” гэж энэ тухай ярьжээ.
Батлан хамгаалахын сайд Сергей Шойгу өчигдөр Хятад, Энэтхэгийн батлан хамгаалахын сайд нартай утсаар ярихдаа энэ тухай бас мэдээлсэн байна.
Тэрбээр Ням гарагт АНУ, Их Британи, Франц, Туркийн сайд нарт бас “бохир бөмбөг”-ийн тухай мэдээлж байв.
Эх сурвалж: Associated Press
