ОХУ-ын ерөнхийлөгч Владимир Путиний халамжлан хүмүүжүүлэгч асан Анатолий Собчакын охин Ксения эх орноосоо дүрвэжээ.
40 настай Ксения Собчак нь телевизийн алдартай хөтлөгч, Оросын сөрөг хүчний улс төрчдийн нэг юм. Тэрбээр 2018 онд ОХУ-ын ерөнхийлөгчийн сонгуульд Путинтэй өрсөлдөж байжээ.
Ксениягийн аав Анатолий Собчак 1990-ээд оны үед Санкт-Петербург хотын захирагч байсан бөгөөд түүний багт Владимир Путин ажиллаж байсан юм.
Өчигдөр Оросын хууль хүчнийхэн Ксениягийн Москва дахь гэрт нэгжлэг явуулжээ. Энэ нь түүний удирддаг байгууллагын хэвлэл мэдээлэл хариуцсан захирал Кирилл Сухановтой холбоотой хууль бус үйлдлийг шалгах ажлын нэг хэсэг болохыг мөрдөн байцаагчид тайлбарласан байна. Мягмар гарагт Ксения уг хэргийг "үндэслэлгүй", "сөрөг хүчний дуу хоолойг хориглох гэсэн улс төрийн явуулга" гэж мэдэгдэж байжээ.
Энэ үйл явдалтай зэрэгцэн Ксения Собчак эх орноосоо дүрвэснийг ТАСС агентлаг мэдээлжээ.
Тэрбээр баривчилгаанаас зугтахын тулд Дубай, Турк рүү нисэх тийз худалдан авч мөрдөгчдийг төөрөлдүүлээд Беларусиар дамжин Литва улс руу дүрвэсэн байна.
Ксениягийн орголт Оросын элит хүрээнийхнийг цочирдуулсан үйл явдал болжээ.
Улс төрийн шинжээч Сергей Марков үүнийг Оросын элит хүрээнийхэнд хэн ч “халдашгүй бус” болохыг анхааруулсан явдал гэж дүгнэсэн байна.
“Хэрвээ тэд Путиний халамжлан хүмүүжүүлэгчийн охиныг баривчилж байгаа бол энэ нь хэн ч баривчлагдах боломжтойг харуулж байна” гэж Марков дүгнэжээ.
Инстаграм сүлжээнд 9.4 сая дагагчтай Ксения улс төрч болохоосоо өмнө реалити шоуны од байсан бөгөөд тансаг амьдрал, гоо үзэсгэлэнгээрээ “Оросын Парис Хилтон” хочтой болж байв.
Эх сурвалж: Associated Press
