Украины дайнд ашиглах зорилготой олон тооны их бууны сумыг Умард Солонгос нууцаар ОХУ-д илгээсэн тухай АНУ-ын ерөнхийлөгчийн ордноос өчигдөр мэдээлжээ.

Эдгээр зэвсгийг Пёньяны дэглэм “Ойрх Дорнод, Умард Африкийн орнууд руу илгээсэн мэт харагдуулах зорилготой” төөрөгдүүлэх арга хэмжээг авсан байсныг Цагаан ордны үндэсний аюулгүй байдлын зөвлөлийн хэвлэлийн төлөөлөгч Жон Кирби сэтгүүлчдэд мэдээлсэн байна.

АНУ-ын засаг захиргаа сумнуудыг Оросын тал яг хүлээж авсан эсэх, илгээхдээ аль улс орноор дамжуулсан зэрэг мэдээллийг баталгаажуулахаар ажиллаж байгааг тэр бас хэлжээ.

Гэхдээ Умард Солонгосын илгээсэн сум Украины дайны нөхцөл байдлыг өөрчлөх нөлөө үзүүлэхгүй гэдэгт итгэлтэй байгаагаа Кирби илэрхийлсэн юм.

“Их бууны сумны тоо дайны нөхцөл байдлыг Өмнөд ба Дорнод фронтын аль ч чиглэлд өөрчилж чадахгүй гэдэгт бид итгэлтэй байгаа” гэж тэр хэлжээ.

Одоогоос бараг хоёр сарын өмнө Оросын тал Умард Солонгосоос зэвсэг худалдаж авахаар судалж буй тухай тагнуулын мэдээллийг Цагаан ордон анх дэлгэж байв. Наймдугаар сард ерөнхийлөгч Байдены засаг захиргаа Оросын батлан хамгаалах яам Иран улсаас дрон худалдаж авах гэж буй тухай анх мэдээлсэн нь сүүлд батлагдсан юм. Одоо Оросын арми Иранд үйлдвэрлэсэн дроноор Украины нутаг дэвсгэрт довтолж байгаа. Гэхдээ хоёр улсын аль аль нь дрон авсан, нийлүүлснээ үгүйсгэсээр байна.

Украинд дайн эхэлж, Өрнөдийн орнуудтай харилцаа муудахын хэрээр ОХУ, Умард Солонгос хоёр улам ойртон нягтарч байгаа.

Пёньяны дэглэм Оросын эзэлсэн газар нутгийг сэргээн босгоход ажиллах хүч нийлүүлэх санал тавьж байв.

Долдугаар сард Умард Солонгос улс ОХУ, Сирийн дараа Украинаас салан тусгаарласан Донецк, Луганскийн тоглоомын улсуудыг хүлээн зөвшөөрсөн гурав дахь улс болж байлаа.

НҮБ-ын тогтоолоор Умард Солонгосыг бусад улсаас зэвсэг импортлох, бусад улс руу зэвсэг экспортлохыг хориглосон байдаг. Хэрвээ ОХУ-д их бууны сум нийлүүлсэн нь батлагдвал энэ нь НҮБ-ын тавьсан хоригийг зөрчсөн хэрэг болох юм.

Эх сурвалж: Associated Press