Иран улс газар нутагт нь ойрын үед цохилт өгөхөөр бэлдэж буй тухай тагнуулын мэдээллийг Саудын Арабын эрх баригчид АНУ-ын засаг захиргаанд дамжуулсан тухай баримтыг The Wall Street Journal өчигдөр мэдээлсэн юм.
Ираны хувьсгалт гвардын дээд командлагч Хоссейн Салами аравдугаар сарын 20-ны өдөр гаргасан мэдэгдэлдээ Саудын Арабын удирдагчдад аюулгүй байдлаа Израилд даатгаад хэрэггүйг анхааруулж байв. Ингэхдээ Саудын язгууртнуудын ордныг “шил шиг хэврэг” хэмээн егөөдсөн нь анхаарал татаж байлаа.
Саудын Араб улс АНУ-ын зуучлалын тусламжтай 2020 онд Израил улстай дипломат харилцаа тогтоосноор Ираны эсрэг бүс нутгийн шинэ эвсэл бий болж байв. Үүнээс гадна Саудын Арабын эрх баригчид өнгөрсөн онд Иран улстай харилцаагаа хэвийн болгох алхам хийж байлаа.
Хэвлэлд гарсан мэдээлэлтэй холбоотойгоор Цагаан ордон өчигдөр байр сууриа илэрхийлсэн байна. “Энэ асуудал бидний санааг зовоож байна. Манай батлан хамгаалахын болон тагнуулын албад Саудын Арабын талтай байнгын холбоотой байгаа. Бид энэ бүс нутаг дахь ашиг сонирхол болон түншүүдээ хамгаалахаас буцахгүй” гэж Цагаан ордны үндэсний аюулгүй байдлын зөвлөлийн хэвлэлийн төлөөлөгч мэдэгджээ.
2019 онд Саудын Арабын нутаг дахь газрын тосны байгууламжуудад пуужин болон дроны халдлага гарсан юм. Саудын тал үүнд Ираныг буруутгасан ч Тегераны эрх баригчид хариу няцааж байжээ.
Исламын шашны Суннит болон Шийт урсгалуудын гол төв болдог хоёр улс олон арван жилийн турш Ойрх Дорнодын бүс нутагт нөлөөгөө бэхжүүлэхээр өрсөлдөж ирсэн түүхтэй.
Ираны аюул заналын асуудал АНУ, Саудын Арабын харилцаанд үл ойлголцол гарсан цаг үетэй давхцан яригдаж байна. Өнгөрсөн сард Саудын Арабын тэргүүлдэг OPEC байгууллага газрын тосны олборлолтоо бууруулах шийдвэр гаргасан нь Вашингтоны ашиг сонирхлын эсрэг үйлдэл болсон юм.
Энэ шийдвэр хоёр улсын харилцаанд сөргөөр нөлөөлж болзошгүйг ерөнхийлөгч Жо Байден анхааруулж, АНУ-ын хэд хэдэн сенатор Саудын Арабтай хамтын ажиллагаагаа хязгаарах, түүний дотор зэвсэг нийлүүлэхээ зогсоохыг Цагаан ордонд уриалж байжээ.
Эх сурвалж: Reuters
