Оросын зэвсэгт хүчин Украины газар нутагт халдан довтолсноос хойш найман сарын дараа тус улсын эдийн засаг уналтад орсон нь энэ долоо хоногт Москвагийн эрх баригчдын зарласан тоо баримтаас тодорхой болжээ.

Энэ оны гуравдугаар улиралд ОХУ-ын дотоодын нийт бүтээгдэхүүний хэмжээ жилийн өмнөх мөн үеэс 4 хувиар буурсан тухай Росстат статистикийн төв байгууллага Лхагва гарагт мэдээлсэн юм.

Хоёрдугаар улиралд эдийн засгийн энэ үзүүлэлт мөн 4.1 хувиар буурч байжээ.

1974 онд эдийн засагч Юлиус Шискиний боловсруулсан түгээмэл онолоор бол аливаа улсын дотоодын нийт бүтээгдэхүүний хэмжээ хоёр улирал дараалан буурвал эдийн засгийн уналт эхэлсэнд тооцдог.

Хэдийгээр гуравдугаар улирлын эдийн засгийн агшилт тооцоолж байсан 7 хувийн бууралтаас хөнгөн туссан ч эдийн засгийн нөхцөл байдлыг эрүүл нүдээр анхааралтай ажиглаж, ямар ч хувилбар нөхцөлд бэлтгэлтэй байх шаардлагатайг Мягмар гарагт Оросын төв банкны ерөнхийлөгч Элвира Набиуллина анхааруулсан юм.

“Тиймээ. Нөхцөл байдал цааш улам муудах магадлалтай. Бид үүнд бэлтгэлтэй байх ёстой” гэж тэр Оросын хууль тогтоогчдод хэлснийг Интерфакс агентлаг дамжуулсан байна.

Төв банк 2022 онд Оросын эдийн засаг 3-3.5 хувиар агших тооцоо гаргасныг Набиуллина энэ үеэр мэдээлжээ.

Эх сурвалж: Business Insider