Хөл бөмбөгийн Дэлхийн Аварга Шалгаруулах Тэмцээнийг зохион байгуулах хороонд ажиллаж буй Катарын албаны хүн энэхүү том арга хэмжээний бүтээн байгуулалтад ажилласан цагаач ажилчдаас 400-500 орчим нь амиа алдсаныг өчигдөр мэдээлжээ.

Энэ бол Катарын эрх баригчдын өмнө нь өгч байсан тоонуудаас хамгийн өндөр нь юм.

Зохион байгуулах хорооны гишүүн Хассан Аль Тавади өчигдөр Британийн нэрт сэтгүүлч Пирс Моргантай ярилцахдаа энэ тоог хэлсэн байна.

Катар улс Ойрх Дорнодын бүс нутагт анх удаа ДАШТ зохион байгуулахын тулд $200 гаруй тэрбумыг стадион, метроны шугам зэрэг дэд бүтцийн бүтээн байгуулалтад зарцуулсан гэдэг.

Ингэхдээ олон мянган цагаач ажилчдын хүчийг ашигласан юм.

Хүний эрхийн байгууллагууд цагаач ажилчдын ажиллаж, амьдрах нөхцөл, хөдөлмөрийн аюулгүй байдал маш муу байсныг шүүмжилж байгаа.

“ДАШТ-ий бүтээн байгуулалтад ажилласан цагаач ажилчдаас амиа алдсан хүмүүсийн тоог бодитой, чин үнэнээр хэлж чадах уу?” гэж Морганыг асуухад Тавади “Ойролцоогоор 400-500 хүн амиа алдсан. Нарийн тоог би мэдэхгүй байна. Үүнийг тодруулахаар ажиллаж байгаа” гэж хариулжээ.

Өмнө нь Катарын эрх баригчид энэ тоог 40-өөс хэтрэхгүй гэж мэдээлж байсан юм.

ДАШТ-ийг зохион байгуулах эрхийг ФИФА 2010 онд Катар улсад олгосноос хойш бүтээн байгуулалттай холбоотой хүний эрхийн асуудал сөхөгдөж эхэлсэн байдаг.

Тухайлбал цагаач ажилчдын цалин хангамж, амьдрах орчин нөхцөл, хөдөлмөрийн аюулгүй байдал, ажил олгогчдын дарамт дээрэлхэлт зэрэгт анхаарлаа хандуулахыг хүний эрхийн байгууллагууд Дохагийн эрх баригчдад байнга уриалж байсан юм.

Персийн булангийн баян чинээлэг орнууд Энэтхэг, Пакистан, Шри-Ланка, Бангладеш зэрэг өмнөд Азийн орнуудын ажилчдыг бүтээн байгуулалтын төслүүддээ олноор ажиллуулдаг.

Гэхдээ Тавадигийн хэлсэн тоо Өрнөдийн хэвлэлүүдийн өмнө мэдээлж байснаас хамаагүй бага байгаа юм. Тухайлбал Британийн “The Guardian” сонины эрэн сурвалжлах алба энэ тоог хамгийн багадаа 6,500 гэж тооцоолсон байдаг.

Эх сурвалж: Associated Press