Даваа гарагт Өмнөд Солонгосын шигшээ баг хэсгийн сүүлийн тоглолтдоо баруун Африкийн Гана улсын багт харамсалтайгаар хожигдож, ДАШТ-ий хасагдах шатанд шалгарах магадлал нэлээд буурсан билээ.
Энэ явдалтай холбоотойгоор тус улсын Lotte компанийн үйлдвэрлэдэг “Ghana” брэндийн шоколад анхаарлын төвд ороод байна.
Тоглолтын өмнө Өмнөд Солонгосын эрх баригч консерватив намын дарга Чун Жин Сүк сошиал хуудсандаа хугалсан “Ghana” шоколадны зураг нийтлээд “Гана…Бид өнөө орой танай багийг яг ингэж хожино” гэж бичиж байжээ.
Гэхдээ энэ нь солонгосчуудын ширүүн шүүмжлэлтэй тулгарсан тул улс төрч нийтлэлээ устгаж байсан юм.
Харин Даваа гарагийн орой Өмнөд Солонгосын баг 3:2 харьцаагаар Ганын багт хожигдсоны дараа сошиал орчинд солонгосчуудын зарим нь уур бухимдлаа дээрх шоколадтай холбон илэрхийлж байжээ.
Тухайлбал “Би дахин хэзээ ч Ghana шоколад идэхгүй, оронд нь Hershey хэрэглэдэг болно”, “Би бүх Ghana шоколадыг устгана” гэх зэрэг жиргээнүүдийг олон мянган хүн дэмжсэн байна.
Тоглолтын дараа “Ghana chocolate” гэсэн түлхүүр үг Өмнөд Солонгосын Твиттер орчинд гол сэдэв болж, зарим хүмүүс энэхүү брэндийг бойкотлохыг уриалж байв.
“Ghana” шоколадны брэндийг 1964 онд Lotte Confectionary компани анх бий болгож байжээ. Ингэхдээ какао үйлдвэрлэгч Гана улсын нэрийг ашигласан нь бүтээгдэхүүнийхээ түүхий эдийн гарал үүслийг харуулах зорилготой байсан гэдэг.
Энэхүү брэндээс шалтгаалан солонгосчууд Африк тивийн Гана улсын талаар мэдлэг, мэдээлэлтэй болсон байна.
Эх сурвалж: Korea Times